Ramiz Mehdiyevin kölgəsində ələ keçirilən 8 milyon manat – Axundovanın yaxını növbəti həbsin astanasında
Ramiz Mehdiyevə donos-məktublarında "siz mənim ağsaqqalımsız" yazan, çıxışlarında "Ramiz müəllimin kitabları hər kəsin stolüstü kitabı olmalıdır" kimi açıqlamaları unudulmayan sabiq səfir Elmira Axundovanın adı yenidən gündəmdədir. Bu dəfə onun yaxın çevrəsindən olan Elnur İbrahimovun işi üzərindən sadiq "mehdiyevçi"nin adı gündəmə gəlib.
Musavat.com xəbər verir ki, Bakı Apellyasiya Məhkəməsində hakim Səadət Səlimovanın sədrliyi ilə Elnur İbrahimovun apellyasiya şikayətinə baxılıb.
Axundovanın yaxını Sabunçu Rayon Məhkəməsinin onun işi üzrə çıxardığı qərarı "texniki səhv" kimi təqdim etməyə çalışsa da, məhkəmə onun bu arqumentini qəbul etməyib.
Məsələ burasındadır ki, Elnur İbrahimovun üzərində təmin olunmuş 350 min manatlıq mülki iddia olub. O, həmin mülki iddia üzrə uzun illər hər hansı bir ödəmə etməyib. Mülki iddiaçı Fərman Məmmədov Sabunçu Rayon Məhkəməsinə müraciət etməklə 350 min manatın indeksasiya olunmasını xahiş edib. Məhkəmə 350 min manatın indeksasiya olunması üçün müvafiq ekspertiza təyin edib. Nəticədə məbləğin indeksasiyası aparılıb və 513 min manat olaraq müəyyən edilib.
Əslində məsələ 2013-cü ilə gedib çıxır. Elmira Axundova deputat olduğu dövrdə oğlu Həbib Axundovu yaxın çevrəsində iş adamı kimi təqdim edib. Dubaydan gətiriləcək dəftərxana ləvazimatları ilə böyük gəlir vəd olunub, dividend adı altında vəsaitlər toplanıb. Axundovanın ailə dostlarından ümumilikdə 8 milyon manat toplanıb. Amma realda bu "biznes" kağız üzərində qurulmuş sxemdən başqa bir şey olmayıb. Dividend adı ilə geri qaytarılan pullar zərərçəkənlərin öz vəsaitlərinin cüzi hissəsi olub. Dələduzluq sxeminin üstü açılandan sonra zərərçəkmişlər hüquq-mühafizə orqanlarına müraciət ediblər, deputatın oğlu Həbib Axundovun adını çəkiblər.
Elmira Axundova isə prosesə müdaxilə edərək zərərçəkənləri sakitləşdirməyə çalışıb. "Narahat olmayın, pullar qaytarılacaq" - deyərək vəziyyəti manipulyasiya edib.
Sonrakı mərhələdə "günah keçisi" kimi Elnur İbrahimov ön plana çıxarılıb. Bütün pulların ona çatdığı görüntüsü yaradılıb. 2013-cü ilin avqustunda Həbib Axundov Elnur İbrahimovu Qəbələdə yerləşən "Qafqaz Resort" hotelində Elmira Axundova ilə görüşdürüb. Bir neçə gün sonra İbrahimov gizli şəkildə Gürcüstan sərhədini keçərək ölkəni tərk edib və Rusiyada ailəsi ilə birgə zərərçəkənlərin pulları hesabına kef çəkib.
Azərbaycan hüquq-mühafizə orqanları onu təxminən 3 il tapa bilməyib. 2016-cı ildə Elnur İbrahimov həbs edilib və Bakı Ağır Cinayətlər Məhkəməsində hakim qarşısına çıxarılıb. Məhkəmə onun külli miqdarda dələduzluq əməllərini təsdiqləyib. O dövrdə zərərçəkənlərdən yalnız Fərman Məmmədov mülki iddia ilə çıxış etdiyindən məhkəmə onun mülki iddiasını təmin edib. Beləliklə, Elnur İbrahimovun üzərinə 8 milyon manatlıq dələduzluqdan əldə olunan vəsaitlərin cüzi bir hissəsi - 350 min manat ziyanı ödəmək öhdəliyi qoyulub və 9 il azadlıqdan məhrum edib.
Paradoks ondadır ki, Elnur İbrahimov həbsdə olduğu dövrdə mülki iddiaçı Fərman Məmmədova bir manat belə ödəməyib, halbuki Elmira Axundovanın oğlu Həbib Axundov 55 min manat vəsait qaytarıb. Bu, açıq göstərir ki, İbrahimov ödəmə qabiliyyətinə malik olub, amma xüsusi məqsədlə boyun qaçırıb. Onun əməlinin xüsusilə külli miqdarda dələduzluğa çevrilməsi, zərərçəkmişlərə qarşı və dövlət qarşısında məsuliyyətini labüd edib.
Xatırladaq ki, Elmira Axundova Ramiz Mehdiyev dövründə də yazdığı donos məktublarla tanınırdı. Bu işdə də onun adı mərkəzi fiqur kimi qalır, Elnur İbrahimov isə onun sxemlərinin "günah keçisi" kimi həbsinin labüd olduğunu bir daha göstərir.
Beləliklə, Elnur İbrahimovun həbsini sadəcə onun şəxsi əməlləri ilə izah etmək olmaz. Hazırda Elnur İbrahimovun yeganə real çıxış yolu həqiqəti açmaq və istintaqa, məhkəməyə tam məlumat verməkdir. Bu zaman o, özünə qarşı 513 min manatlıq mülki iddiadan yayına bilər. Eyni zamanda dələduzluq yolu ilə əldə edilmiş 8 milyon manatın kimlərin cibində olduğunu ortaya qoyaraq, hüquqi baxımdan öz mövqeyini gücləndirə bilər. Əks halda, külli miqdarda ziyan vurmuş, ictimai-siyasi kontekstdə "günah keçisi" rolunda ola biri kimi növbəti həbs cəzası labüd görünür.