“Əmanətlərə güzəşt müddəti uzadılmalıdır”

Samir Əliyev: “1999-cu ildən bəri fiziki şəxslərin əmanətləri üzrə ödənilən faizlərdən gəlir vergisi tutulmur”

"6 gündən sonra əmanətçilərə verilən növbəti güzəştin müddəti bitir. Bu o deməkdir ki, əgər yeni güzəşt olmasa, gələn il əmanətlərdən qazanılan gəlirlər vergiyə cəlb ediləcək". "Olaylar"ın məlumatına görə, belə bir fikirlə iqtisadçı-ekspert Samir Əliyev çıxış edib. "Bununla da hər bir əmanətçi qazancının 10%-ni itirməli olacaq. Müxtəlif hesablamalara görə, burda söhbət təxminən 60 milyon manat məbləğində vəsaitdən gedir. Məhz bu qədər vəsaiti dövlət büdcəsi hər il 6,4 milyona qədər əmanətçiyə hədiyyə edir" - deyə S.Əliyev qeyd edib. Ekspertin sözlərinə görə, 1999-cu ildən bəri fiziki şəxslərin əmanətləri üzrə ödənilən faizlərdən gəlir vergisi tutulmur və son dəfə 2013-cü ilin dekabrında qəbul edilmiş "Banklar və digər kredit təşkilatları tərəfindən fiziki şəxslərin əmanətləri üzrə ödənilən faizlərin gəlir vergisindən azad edilməsi haqqında" Qanunla güzəşt müddəti daha 1 il uzadılıb. Samir Əliyev hesab edir ki, son 2 ildə güzəşt müddətinin cəmisi 1 il uzadılması əmanətçilərə verilən dəstəyin tezliklə dayandırılacağı deməkdir. O, vurğulayıb ki, əmanətlərə tətbiq etdiyi güzəştlərin müddəti ən azı 2015-ci ilin sonuna qədər uzadılmalıdır: "Əks halda bu əmanət bazarında, ümumilikdə isə bank sektoru üçün narahatçılıq yarada bilər. Bank sektorunun düşdüyü vəziyyət isə ölkə iqtisadiyyatına mənfi təsiri göstərəcək".