Respublikaçı senator Markveyn Malin “MEGOBARI Aktı”nın qəbulunu əngəlləyir - ÖZƏL
ABŞ-da "Respublikaçı" senator Markveyn Malin "MEGOBARI Aktı"nın qəbulunu əngəlləyib. Olaylar.az xəbər verir ki, bu barədə The Hill nəşri Konqresdəki mənbələrə istinadən məlumat yayıb. Məlumata görə, ötən ayın sonunda Malin Senatın çoxluq lideri Con Tuneni razı salaraq, Milli Müdafiə Avtorizasiya Aktının (NDAA) paketindən "MEGOBARI Aktı"nı çıxartdırıb. Senator həmçinin ilin əvvəlində qanun layihəsinin sürətlə qəbul edilməsini də bloklamışdı. Qanun layihəsinə digər respublikaçı senator Rend Pol da qarşı çıxır. Konqresdəki mənbə bildirib ki, sənədin qəbuluna çoxlu senator dəstək verib və layihə Nümayəndələr Palatası ilə komitədən də keçib. "Bir senatorun onu əngəlləməsi, doğrudan da, məyusedicidir", - deyə mənbə vurğulayıb. Nəşrin yazdığına görə, Malinin mövqeyi təəccüb doğurur, çünki 2020-ci ildə o, "Gürcü Arzusu"nu ABŞ-ın rəqibləri ilə yaxınlaşmaqda tənqid edirdi. Malin The Hill ilə müsahibəsində qanun layihəsinə qarşı çıxmasının səbəbi kimi Gürcüstanın baş naziri İrakli Kobaxidze ilə "yaxşı münasibətləri" göstərib. O bildirib ki, sənədin qəbul edilməsi Vaşinqton-Tbilisi əlaqələrinə zərər verə bilər: "Onlarla işləmək, onların əsl suverenliyə sahib olub Rusiyanın təsirindən qurtula biləcəyini görmək istəyirəm. Sanksiya tətbiq etməzdən əvvəl əməkdaşlığa üstünlük verirəm", - deyə Malin vurğulayıb.
Nəşr senatorun 2020-ci ildə yazdığı məqaləni də xatırladıb. Həmin yazıda Malin ABŞ şirkətlərinin Gürcüstanda qarşılaşdığı çətinliklərdən bəhs edirdi. O vaxt "Conti Group" Qara dənizdəki 600 milyon dollarlıq liman layihəsini icazə ala bilmədiyi üçün dayandırmış, "Frontera" şirkəti isə sərt tənzimləmələrlə üzləşmişdi.
Malin The Hillə bildirib ki, indi "Frontera" ilə heç bir əlaqəsi yoxdur və 18-24 aydır şirkətlə təmas qurmayıb. Ancaq məlumata görə, "Frontera"nın təsisçisi Stiv Nikandros 2020-ci ildən bəri senatorun seçki kampaniyalarına 6000 dollara yaxın ianə edib. Konqresdəki respublikaçı dairələr Malinin Gürcüstan hökuməti ilə bağlı optimizmini anlaşılmaz sayır. Onların fikrincə, Malin Tbilisidə "Çin və İranı müdafiə edən rejimi" qorumaq istiqamətində addımlar atır. Senator Gürcüstandakı 2024-cü ilin parlament seçkilərinin nəticələrini qiymətləndirməkdə tərəddüd etdiyini də deyib: "Orada müşahidəçilərimiz olub, amma bəlkə də köhnəfikirliliyimdir, mən şəxsən görməyi üstün tuturam". Malin sonuncu dəfə Gürcüstanda 2021-ci ildə olub və yenidən səfər etməyi planlaşdırır. Respublikaçı senator Rodjer Uiker isə bildirib ki, "MEGOBARI Aktı" NDAA-ya düzəliş şəklində əlavə oluna bilər. Demokrat senator Cin Şahin də vurğulayıb ki, layihənin hər iki partiyanın dəstəyi var və o, respublikaçılarla birlikdə onun qəbuluna çalışacaq.