Daha bir qonşudanÇinə kəskin etiraz: Bu ərazidə yeni qurğu quraşdırır

Yaponiya hökuməti Şərqi Çin dənizinin mübahisəli bölgəsində yeni qurğu tikmək planlarına görə Çinə etiraz bildirib.

Musavat.com xəbər verir ki, məlumatı Yaponiya Nazirlər Kabinetinin baş katibi Yoşimasa Hayaşi açıqlayıb. Onun sözlərinə görə, diplomatik kanallar vasitəsilə Çinə kəskin etiraz edilib: "Biz Çinin Şərqi Çin dənizində coğrafi bərabərlik xəttinin şərqində daha bir qurğu inşa etmək niyyətini təsdiqlədik. Eksklüziv iqtisadi zonalar və qitə şelfinin müəyyən edilmədiyi halda Çinin bu sahədə birtərəfli addımlar atmasını son dərəcə təəssüfləndirici hesab edirik".

Qeyd edək ki, Çin iki ölkənin eksklüziv iqtisadi zonalarını müəyyən edən  xəttin yaxınlığında fəal şəkildə qazma işləri aparır. Yaponiya hökuməti hesab edir ki, Çin dəniz dibi altında ortaq zonada yerləşən yataqlardan təbii qazı çıxarmağa çalışır. Yaponiya tərəfinin məlumatına görə, Çin ərazidə 20 sabit qazma qurğusunu idarə edir.

Çin isə iki ölkənin iqtisadi zonaları arasında Yaponiya tərəfindən müəyyən edilmiş demarkasiya xəttini tanımır və onun daha şərqdə, demək olar ki, Yaponiyanın cənubundakı Okinava adasının sərhədində lazım olduğunu iddia edir. Beynəlxalq hüquqa görə, bu cür mübahisə iki ölkə arasında razılaşma yolu ilə həll edilə bilər. 2008-ci ildə Tokio və Pekin Şərqi Çin dənizində qaz yataqlarının birgə işlənməsi haqqında saziş imzalayıb. Lakin 2010-cu ildə Yaponiya Sahil Mühafizəsi Yaponiya ilə Çin arasında ərazi mübahisəsinin predmeti olan Senkaku adaları (Diaoyu) yaxınlığında Çin balıqçı trol gəmisini saxladıqdan sonra bu məsələ ilə bağlı danışıqlar dondurulub.