Aşotyan: “Paşinyan insanı alçaldan müasir avtoritarizm qurur” – ÖZƏL

Olaylar.az xəbər verir ki, avqustun 25-də Şirak yeparxiyasının rəhbəri, Erməni Apostol Kilsəsinin arxiyepiskopu Mikael Acapaxyana qarşı məhkəmə iclasından öncə jurnalistlərə açıqlama verən Ermənistan Respublika Partiyasının sədr müavini Armen Aşotyan Baş nazir Nikol Paşinyanı sərt tənqid edib.

Onun sözlərinə görə, Paşinyanın qurduğu rejim "insanları alçaldan müasir avtoritarizm"dir:
"Bəli, hələlik efirdə heç kimi qətlə yetirməyiblər, amma bu avtoritarizm - aldatmaq, insanları qorxutmaq və hakimiyyətini klassik üsullarla qoruyub saxlamaqdan ibarətdir. Arxiyepiskop Mikael təkcə dini deyil, ictimai həyatda da mühüm addır və bu ad həmişə aktiv qalacaq".

Aşotyan qeyd edib ki, Paşinyanı heç vaxt zəif saymaq olmaz:
"O, yalanında, mənəviyyatsızlığında və düşüncəsizliyində istedadlıdır. Təəssüf ki, müxalifət 2018-ci ildən sonra bu dərsi öyrənmədi. Əgər kiminsə düşündüyü kimi, o, nəyəsə qadir deyil, ertəsi gün sübut edir ki, daha böyük işlərə qadirdir".

2026-cı il seçkilərinə toxunan siyasətçi bildirib:
"Paşinyanın təklif etdiyi seçim sülh və müharibə arasında yox, Ermənistan və Azərbaycan arasında seçimdir. O, açıq şəkildə xalqa deyir ki, səsvermədə ya Ermənistanı, ya da Azərbaycanı seçəcəksiniz. Bu isə onun növbəti yalanlar zəncirini qurduğunu göstərir".

Aşotyan vurğulayıb ki, əsas məqsəd hakimiyyət dəyişikliyinə nail olmaqdır:
"Bizim vəzifəmiz hakimiyyət dəyişikliyini konstitusion yolla, mümkün qədər tez həyata keçirməkdir. Biz təslim olmamalıyıq. Mən və partiyamın bir missiyası var, onu da yerinə yetirəcəyik. Şər o zaman məğlub olur ki, özünü cəzasız hesab edir".