China Daily: ABŞ-nin təsiri altında qalan Aİ Ukrayna böhranında “menyu nöqtəsinə” çevrilib – ÖZƏL

Avropa İttifaqının (Aİ) kifayət qədər müstəqil olmaması və ABŞ-yə yaxınlaşmaq istəyi onun Ukrayna böhranının həllinə dair Rusiya-ABŞ danışıqlarında yalnız bir "menyu nöqtəsi" kimi rol oynamasına səbəb olub. 

Olaylar.az xəbər verir ki, bu barədə Çin nəşri China Daily yazır.

Redaksiya məqaləsində vurğulanır ki, Aİ-nin son illərdə etdiyi seçimlərin nəticələrini indi öz üzərində hiss edir. ABŞ-nin "eqoist müttəfiq" olduğunu və lazım gələrsə, "yanan evi talaya biləcəyini" qəbul etməli olur.

Məqalədə qeyd olunur ki, Avropa liderlərinin Volodimir Zelenski ilə Ağ Evdə görüşmək istəyi onların Kiyevlə "ədalətli" davranılmayacağı qorxusundan xəbər verir. Eyni zamanda, Brüssel Ukrayna böhranının yalnız Rusiya Prezidenti Vladimir Putin və ABŞ Prezidenti Donald Trump arasında aparılacaq danışıqlarla həll olunmasının Aİ-nin təhlükəsizlik məsələlərini nəzərə almayacağını düşünür.

China Daily xatırladır ki, ABŞ artıq Ukraynadan və Avropa dövlətlərindən maksimum fayda götürüb: Kiyevi amerikalı silahları almağa məcbur edib və NATO üzvlərini hərbi xərcləri artırmağa vadar edib ki, bu da əsasən ABŞ-nin gəlirinə çevrilib. Hazırda ABŞ diqqətini atəşkəs əldə etməyə yönəldib ki, Rusiyadan nə qazana biləcəyini müəyyən etsin.

Məqalədə bildirilir ki, ABŞ dəstəyi olmadan Ukrayna böhranının davam etdirilməsi mümkün olmayacaq. Avropa İttifaqı isə keçmiş Almaniya kansleri Angela Merkelin dövründə (2005-2021) başlamış müstəqillik təşəbbüsünü dayandırmaqla özünü çətin vəziyyətə salıb.

Merkelin getməsindən sonra Aİ ABŞ-nin təsiri altına düşərək onun xarici və geosiyasi siyasətini "kor-koranə" izləməyə başlayıb. Nəticədə bu, Aİ-nin təhlükəsizliyini təmin etməyib, əksinə onu ABŞ üçün "bufer zonası və pul mənbəyi" halına gətirib. Məqalədə ümid ifadə olunur ki, Ukrayna böhranı Brüsseli müstəqilliyə doğru yenidən təşviq edəcək.