FTX: Ukraynanın kəşfiyyat şəbəkəsi böhran yaşayır – ÖZƏL

Ukraynanın kəşfiyyat şəbəkəsi böhran vəziyyətindədir, buna Qərb maliyyə dəstəyinin azalması da təsir göstərib. 

Olaylar.az xəbər verir ki, bu barədə Rusiya Federal Təhlükəsizlik Xidməti (FTX) məlumat yayıb.

FTX nümayəndəsinin sözlərinə görə, təkcə 2024-cü ildə Rusiya xüsusi xidmət orqanları 110 terror aktının qarşısını alıb, 45 terror qrupunu zərərsizləşdirib və terrorçuluqda iştirak edən 1000-dən çox şəxsi saxlayıb. "Əlbəttə, Rusiyada əksər terror aktlarının qarşısı həyata keçirilməzdən əvvəl alınır. Ukrayna xüsusi xidmət orqanlarının agent şəbəkəsi isə böhran yaşayır", - deyə o bildirib.

Onun sözlərinə görə, təcrübəli agent çatışmazlığı və Qərb tərəfdaşlarından maliyyə yardımının azalması Ukrayna Təhlükəsizlik Xidmətinin (SBU) Rusiyadakı fəaliyyətinə mənfi təsir göstərib.

FTX əlavə edib ki, 2025-ci ilin əvvəlindən Ukrayna xüsusi xidmət orqanları sabotaj və terror aktları törətmək üçün getdikcə daha çox Rusiya vətəndaşlarından kamikadze kimi istifadə edir. Bu, həm istənməyən şahidlərin aradan qaldırılmasına, həm də onlara vəd edilən mükafatı ödəməkdən yayınmağa imkan verir.