Niderland Hərbi Hava Qüvvələri Qəzzaya humanitar yardım əməliyyatına başlayıb – ÖZƏL

Niderlandın Kral Hərbi Hava Qüvvələrinə məxsus hərbi-nəqliyyat təyyarəsi Qəzza zolağına humanitar yardım çatdırılması məqsədilə Əyndhoven aviabazasından İordaniyaya yola düşüb. 

Olaylar.az xəbər verir ki, bu barədə De Telegraaf qəzeti məlumat yayıb.

Məlumata görə, C-130 tipli təyyarə iki həftə ərzində hər gün Qəzza üzərində təxminən 1 ton humanitar yardım - ümumilikdə 16 blok ərzaq və tibbi ləvazimat - havadan atacaq. Yardım paketləri İordaniyanın xeyriyyə təşkilatları tərəfindən hazırlanıb və un, düyü, uşaq qidası, eləcə də bir sıra ilkin tibbi vasitələri əhatə edir.

Təyyarə yerli vaxtla saat 09:00-da Niderlandı tərk edib.

Qəzetin məlumatına əsasən, Niderlandla yanaşı, bu humanitar hava əməliyyatlarında Birləşmiş Ərəb Əmirlikləri, Misir, İspaniya, Fransa və Almaniya da iştirak edir.