“Keçmiş prezidentlər seçkidə iştirak etməməlidirlər” – “Armeniya2026” hərəkatının qurucusu – ÖZƏL

Olaylar.az xəbər verir ki, "Armeniya2026" hərəkatının qurucusu Narek Manukyan keçmiş prezidentlərə müraciət edərək, 2026-cı il parlament seçkilərində iştirak etməməyə çağırıb. O bildirib ki, əgər müxalifət düşərgəsinin önündə yenə keçmiş prezidentlər və ya onlarla sıx bağlı şəxslər dayansa, bu, hazırkı baş nazir Nikol Paşinyanın qələbəsi ilə nəticələnəcək:

"Əgər keçmiş prezidentlər seçkilərdə iştirak etsələr, bu, Nikol üçün ideal müxalifət mənzərəsi olacaq. Onlar şəxsi və partiya maraqlarını kənara qoyaraq xalqın və millətin mənafeyini düşünməlidirlər. Əsas məqsəd Nikol Paşinyanın 2026-cı ildə yenidən seçilməsinin qarşısını almaqdır."

Manukyanın fikrincə, keçmiş prezidentlər seçkilərə az qalmış öz tərəfdarlarını real keçid şansına malik olan digər müxalif qüvvəni dəstəkləməyə çağırmalıdır:

"Bu halda Nikolun 'keçmişlərin qayıdışı' tezisi heç bir məna daşımayacaq. Biz - müxalifət və xalq olaraq - belə bir addımı yüksək qiymətləndirəcəyik. Sizin böyük kadr potensialınız gələcəkdə mütləq dəyərləndiriləcək."

Narek Manukyan vurğulayıb ki, bu cür vaxtında verilmiş və məsuliyyətli qərar Ermənistanın gələcəyində həlledici rol oynaya bilər.