Rusiya miqrantları Ukrayna müharibəsinə cəlb etməyə çalışır- ÖZƏL

"Rusiyada miqrantlara qarşı qaydaları sərtləşdirməyə çalışırlar. Bunun da iki əsas qaydası var. Birinci qayda odur ki, hansısa ölkəyə təzyiq eləmək üçün bu metoddan istifadə edir". Bu sözləri politoloq Turab Rzayev Olaylar.az-a açıqlamasında qeyd edib. 

Politoloq digər qaydanın miqrantları Ukrayna müharibəsinə cəlb etmək olduğunu bildirib:

"Məsələn, Rusiyanın Özbəkistan, Tacikistan və Azərbaycanla, əsas miqrant göndərən ölkələrlə problemi var. Bu problemi həll eləmək üçün bəzi hallarda həmin ölkələrdən gəlib Rusiyada işləyən şəxslərə, miqrantlara qarşı hansısa şəkildə təzyiq yaratmağa çalışırlar. Ən azından həmin miqrantlar arasında narazılıq yaratmaq istəyirlər ki, həmin ölkələrə təzyiq üsulu olsun. Əvvəllər də bunu ediblər. Azərbaycan məsələsində bu çox vaxt işləməyib. Azərbaycan dövləti həmişə qəti mövqe ortaya qoyub ki, biz miqrantlara qarşı olan haqsızlıqlardan sonra belə Rusiyanın istəklərini qəbul etməyəcəyik. İkinci məsələ isə Ukrayna müharibəsi ilə bağlıdır. Hazırda Rusiya müharibəyə canlı qüvvə çatdıra bilmir. Neçə dəfə səfərbərlik elan edilib, insanlar məcburi hərbiyə aparılır, amma alınmır. Hətta Şimali Koreyadan ordu gətirirdilər,  miqrantlara xüsusi güzəştlər tətbiq edirlər, Rusiya vətəndaşlığı, pul təklif edirlər, Rusiya əhalisinə çox yüksək məbləğdə maddi imkanlar təqdim edirlər ki,  daha çox əhalini döyüşə cəlb edə bilsinlər. Ancaq yenə də çatmır. Canlı qüvvə əksikliyi var. Bu formada  çalışırlar ki, miqrantlara yeni qadağalar qoymaqla onları məcbur eləsinlər. Məsələn, sənədləri yoxdursa uşaqlar təhsil ala bilməz, işləyə bilməzlər, deport olunacaqlar və.s.  Məcbur edirlər ki, "gəlin orduya yazılın və biz sizə böyük vəsaitlər verəcəyik və uşaqlarınız məktəbdə oxuyacaq, ailəniz daimi maaş, pensiya alacaq". Bu şəkildə Ukrayna cəbhəsində ordu yığmağa çalışırlar".

Zeynəb Mustafazadə