ABŞ orbitdə yanacaq doldurma sistemi hazırlayır- ÖZƏL

Olaylar.az xəbər verir ki,  ABŞ Kosmik Qüvvələri və Northrop Grumman şirkəti peyklərin orbitdə yanacaq doldurulmasını təmin edəcək sistemin hazırlanması üçün müqavilə imzalayıb. Bu layihə Elixir adlandırılıb və ABŞ Müdafiə Nazirliyi üçün strateji əhəmiyyət daşıyır.

Defense News nəşrinin məlumatına görə, 2024-cü ildən Northrop Grumman Kosmik Qüvvələrin sifarişi ilə GAS-T (Geosynchronous Auxiliary Support Tanker) adlı yanacaq doldurma peykini hazırlayır. Elixir proqramı bu təcrübəyə əsaslanaraq tam funksional yanacaq doldurma sisteminin yaradılmasını və sınaqlarını nəzərdə tutur. Lakin sınaqların başlanma tarixi və müqavilənin dəyəri açıqlanmayıb.

Üç əsas vəzifə və 2027-ci il missiyası

Layihənin rəhbəri Loren Smit bildirib ki, şirkət üç əsas məsələnin həllinə fokuslanıb: peyklərin bir-birinə yaxınlaşmasını təmin etmək, onların avtomatik birləşməsini təşkil etmək və yanacağın bir aparatdan digərinə ötürülməsini həyata keçirmək. Yanacaq tədarükünü orbitə daşımaq üçün ROOSTER-5 (Rapid On-Orbit Space Technology Evaluation Ring) aparatı istifadə ediləcək. Bu cihazın 2027-ci ildə kosmosa göndərilməsi planlaşdırılır.

ABŞ-ın kosmos strategiyası və geosiyasi kontekst

Defense News xəbər verir ki, ABŞ Kosmik Qüvvələri orbitdə yanacaq doldurma texnologiyasını kosmosdakı mobil imkanlarını artırmaq üçün vacib hesab edir. Pentaqon, xüsusilə Rusiya və Çinin kosmik texnologiyalar sahəsində inkişafını nəzərə alaraq, bu sistemin əhəmiyyətini vurğulayır.