Aİ məhkəməsi Timçenkoların sanksiyalarla bağlı iddiasını rədd etdi – ÖZƏL

Lüksemburqdakı Avropa Ədalət Məhkəməsi Rusiya iş adamı Gennadi Timçenko və onun həyat yoldaşı Yelena Timçenkonun Avropa İttifaqı (Aİ) Şurasına qarşı sanksiyaların ləğvi tələbi ilə qaldırdığı iddiaları rədd edib. 

Olaylar.az xəbər verir ki, bu barədə TASS məlumat yayıb.

Məhkəmə hər iki iddianın təmin olunmadığını elan edib və iddiaçılara məhkəmə xərclərini özlərinin ödəməli olduğunu bildirib.

Timçenkolar yalnız sanksiyaların ləğvini deyil, həm də Aİ Şurasının onlara mənəvi zərər üçün 1 milyon avro təzminat ödəməsini tələb edirdi.

Məhkəmə sənədlərinə görə, iddiaçılar altı hüquqi arqument irəli sürüblər. Onlar Aİ Şurasının sanksiyalarla bağlı əsasları səhv qiymətləndirdiyini və "qara siyahıya" salınmalarının səbəblərini aydın şəkildə izah etmədiyini iddia ediblər. Həmçinin, Timçenkolar məhkəmədə onların dinlənilmək hüququnun pozulduğunu, qərarın proporsionallıq prinsipinə zidd olduğunu və Aİ vətəndaşı kimi əsas hüquqlarının tapdalandığını qeyd ediblər.

Bundan əlavə, onların mülkiyyət hüququnun, eləcə də şəxsi və ailə həyatına hörmət hüququnun pozulduğu vurğulanıb. Lakin Avropa Ədalət Məhkəməsi bu arqumentlərin heç birini əsaslı hesab etməyib və sanksiyaların qüvvədə qalmasına qərar verib.