Vaşinqtondan Brüsselə xəbərdarlıq: Silahı bizdən almasanız...

ABŞ öz avropalı müttəfiqlərinə Amerika silahlarının alışının azaldılmasının onlar üçün mənfi nəticələrə səbəb ola biləcəyinə dair xəbərdarlıq edib. 

Olaylar.az xəbər verir ki, məlumatı Reuters öz mənbələrinə istinadən yayıb.

Agentlik qeyd edir ki, martın ortalarında Avropa Komissiyası üzv dövlətlərə ABŞ-ın NATO-da hərbi iştirakını azaltmaq ehtimalına hazırlıq üçün hərbi xərcləri artırmağı və birgə müdafiə layihələri üçün resursları birləşdirməyi təklif edib. Təklif olunan tədbirlərin bəziləri, ekspertlərin fikrincə, Aİ ölkələrinin yenidən silahlanmasında "qeyri-Avropa şirkətlərinin, o cümlədən ABŞ-dan olan şirkətlərin rolunu azalda bilər".

Bildirilir ki, ABŞ dövlət katibi Marko Rubio martın 25-də Litva, Latviya və Estoniya xarici işlər nazirləri ilə görüşündə Vaşinqtonun Aİ-nin müdafiə satınalmalarında iştirakını davam etdirmək istədiyini açıqlayıb. Rubionun sözlərinə görə, Amerika şirkətlərinin Avropa tenderlərindən kənarda qalması Ağ Ev tərəfindən mənfi qarşılanacaq. Dövlət Departamentinin yüksək rütbəli rəsmisi bildirib ki, ABŞ dövlət katibi bu mövzunu NATO xarici işlər nazirlərinin Brüsseldə keçiriləcək görüşündə müzakirə etmək niyyətindədir.
Xatırladaq ki, Aİ ABŞ-ın Avropa təhlükəsizliyinin təmin edilməsində öz rolunu minimuma endirmək istəyi fonunda Ukraynanı dəstəkləmək və Rusiyanı cilovlamaq məqsədi daşıyan hərbi-sənaye kompleksinə investisiyaların artırılması və hərbi istehsal həcminin artırılması üzrə irimiqyaslı layihəyə başlamaq niyyətindədir. 

Brüsselin hazırladığı müvafiq sənəddə deyilir ki, Avropa hərbi-sənaye kompleksinin bərpası Aİ-nin icma daxilində istehsal olunan müdafiə təyinatlı məmulatları almaq imkanını prioritet olaraq "nəzərdən keçirməlidir". Həmçinin Avropada bazarın parçalanmasına qarşı mübarizə məqsədilə icma ölkələri tərəfindən silahların "birgə alışının" təşkili təklif edilir.