Almaniyadakı qaçqınlardan ictimai işlərdə işləmələri tələb olunub- ÖZƏL

Almaniyanın Baden-Vürtemberq əyalətində yerli siyasətçilər ölkədə sığınacaq axtaran şəxslərin ictimai maraqlara uyğun işlərdə işə götürülməsini tələb ediblər.

Olaylar.az xəbər verir ki, Xristian Demokratik Birlik Partiyasının (CDU) Baden-Vürtemberq Əyalət Məclislərinin sədri Yoahim Valter parlament iclasında "Sığınacaq axtaranların alternativ olaraq ictimai maraqlara uyğun fəaliyyət göstərən təşkilatlarda da çalışması bizim üçün və sosial qəbul baxımından əhəmiyyətli olacaq" deyib. 

Baden-Vürtemberq şəhər şuralarının sədri Steffen Jaeger də şəhər şurasının iclasında ölkədəki qaçqınların vəziyyətinə toxunub.

Almaniyanın ehtiyacı olanlara əl uzatdığını qeyd edən Jaeger, "Dövlət hər bir fərddən öz imkanları daxilində cəmiyyətin uğuruna töhfə verməsini gözləməyi bacarmalıdır" deyib. 

Xristian Sosial Birlik Partiyası (CSU) Bundestaq Qrupunun sədri Aleksandr Dobrindt Almaniyada işləmək istəməyən mühacirlərin olduğuna diqqət çəkərək, sosial yardım alan mühacirlərə daha az maaş verilməsini təklif edib.

Dobrindt, "İşləmək harmoniyaya töhfə vermənin bir parçasıdır. Əgər bu təkliflər qəbul olunmazsa, maliyyə yardımı da azaldılmalıdır" ifadəsini işlədib.