Finlandiya dərman istehsalçısı Rusiya bazarını tərk etdi - ÖZƏL

Finlandiyanın "Orion Pharma" dərman şirkəti Rusiya bazarını tərk edərək ölkədə fəaliyyətini dayandırıb.

Olaylar.az xəbər verir ki, bu barədə qurumun saytında dərc olunan hesabatında deyilir.

Şirkət Rusiyanın əsas dərmanlar siyahısına daxil edilmiş hormonal antiinflamatuar dərman Metipredin əsas istehsalçısıdır. Hesabatda Orion ölkədəki fəaliyyətini nə vaxt məhdudlaşdırdığını dəqiqləşdirməyib, lakin bu addımdan sonra əməliyyat mənfəətinin 25 milyon avro azaldığını qeyd edib.

Şirkətin mətbuat xidməti bildirib ki, onun Rusiyada 2023-cü ilin sonunadək dövriyyəsi ötən illə müqayisədə kəskin şəkildə azalacaq. Eyni zamanda, mətndə tədarükün tamamilə dayandırılmasından bəhs edilmir.

Hesabatda həmçinin qeyd olunub ki, 2022-ci ilin may ayından etibarən şirkət artıq hormon əvəzedici terapiya üçün istifadə edilən Divigel dərmanını ölkəyə tədarük etmir.

Martın sonunda "Kommersant" mənbələrə istinadən yazıb ki, amerikalı əczaçılıq istehsalçısı Eli Lilli Rusiya bazarını tərk edərək biznesin idarə edilməsini Mərkəzi və Şərqi Avropadakı tərəfdaşı, İsveçrədə qeydiyyatdan keçmiş distribyutor Swixx Biopharma-ya ötürmək qərarına gəlib.

Daha əvvəl bildirilmişdi ki, Rusiyadan çıxdığını elan edən Qərb şirkətlərinin əksəriyyəti ölkədə işləməyə davam edir.