ABŞ-da silahlı hücum terroru: 5 ayda minlərlə insan öldü- ÖZƏL

Olaylar.az xəbər verir ki, ilin əvvəlindən ABŞ-da silahlı zorakılıqlar nəticəsində 17 737 nəfər həyatını itirib. 

Bu gün ABŞ-da "Milli Silah Zorakılığı Maarifləndirmə Günü" kimi tanınır və buna görə də ölkədə silah zorakılığı yenidən müzakirə olunur. Ölkədəki silahlı zorakılıqları arxivləşdirən Silah Zorakılığı Arxivinin  məlumatına görə, bu il ABŞ-da 268 kütləvi atışma həyata keçirilib. Son 5 ayda ABŞ-ın müxtəlif bölgələrində baş verən silahlı zorakılıqlarda 17737 nəfər həyatını itirib, 14723 nəfər isə yaralanıb. Silah zorakılığının qurbanları arasında 0-11 yaş arası 113 uşaq və 12-17 yaş arası 642 uşaq var. 0-17 yaş arası yaralanan uşaqların sayı 1894 olaraq qeyd edilib. Silah Zorakılığı Arxivinin məlumatlarına görə, 2022-ci ildə silahlı zorakılıq nəticəsində 44.362 nəfər həyatını itirib, 38.592 nəfər isə yaralanıb. Yenə ötən ilin məlumatlarına görə, 0-17 yaş arası 1683 uşaq silahlı zorakılığın qurbanı olub, 4487 uşaq isə yaralanıb.

Dünyada ən kütləvi atışmaların yaşandığı ABŞ-da silahlanma mədəniyyəti ən çox müzakirə olunan məsələlərdən biridir. Siyasətdən tutmuş vətəndaş cəmiyyətinə qədər ölkədə silah əleyhinə olan kəsimlər fərdi silahlanma hüququnun qanuni məhdudlaşdırılması tələblərini səsləndirirlər.