Eldar Quliyev: “Pandemiya ilə mübarizədə parlamentlərin də üzərinə böyük məsuliyyət düşüb”
Qara Dəniz İqtisadi Əməkdaşlıq Təşkilatı Parlament Məclisinin və Baltik Assambleyasının Daimi Komitələrinin onlayn formatda birgə iclası keçirilib.
Qara Dəniz İqtisadi Əməkdaşlıq Təşkilatı Parlament Məclisinin və Baltik Assambleyasının Daimi Komitələrinin onlayn formatda birgə iclası keçirilib. "Olaylar" xəbər verir ki, dünyada dənizlərin qorunması, iqlim dəyişikliyi və biomüxtəliflik, COVİD-19 pandemiyası ilə mübarizə üsulları mövzularına həsr edilmiş iclası giriş sözü ilə Milli Məclisin Hesablayıcı Komissiyasının sədri, QDİƏT PM-in vitse-prezidenti Eldar Quliyev açıb. Eldar Quliyev çıxışında bildirib ki, uzaq coğrafiyalarda yerləşən, fərqli ənənələrə, dinlərə və mədəniyyətlərə sahib olan Baltik və Qara dəniz bölgələrini bir çox ümumi maraqlar və problemlər birləşdirir. Bir ildən artıqdır ki, bütün dünya COVID-19 pandemiyası ilə mübarizə aparır. Bu dövrdə parlamentlərin üzərinə də böyük məsuliyyət düşüb. Qurumların üzvü olan ölkələrin parlamentləri yeni reallıqlara uyğun olaraq müasir texnologiyalardan istifadə etməklə beynəlxalq fəaliyyətlərini davam etdirib, COVID-19 böhranının iqtisadi və sosial təsirlərinin azaldılmasına yönəlmiş dəstək tədbirləri keçiriblər. O, qeyd edib ki, pandemiyanın insan sağlamlığını ciddi şəkildə təhdid etməsi bütün səviyyələrdə beynəlxalq əməkdaşlıq və koordinasiyanın gücləndirilməsini tələb edir. İndiki məqamda yalnız sıx əlaqələr və yardım tədbirləri virusun ölkələrdə mənfi təsirlərini azalda bilər.
Eldar Quliyev vurğulayıb ki, qloballaşma prosesləri insan sağlamlığı və rifahının ayrılmaz hissəsi olan ətraf mühitin mühafizəsini də zəruri edir. QDİƏT dövlətləri beynəlxalq təşkilatlar və vətəndaş cəmiyyəti ilə birlikdə konkret nəticələrə yönəlmiş konstruktiv dialoqa getməlidirlər. Çirkli ərazilərin bərpası, ekoloji problemlərin qarşısının alınması, mənfi nəticələrin aradan qaldırılması məqsədi ilə təsirli ətraf mühit siyasəti həyata keçirilməlidir. O, bundan sonra QDİƏT və Baltik Assambleyası arasında daha səmərəli, konstruktiv əməkdaşlığa ümid etdiyini bildirib. Koronavirusla mübarizədə bütün ölkələrə gözlənilməz təsirlərdən uzaq olmağı və sağlamlıq arzulayıb. Onlayn toplantıya Rumıniyalı deputat, QDİƏT PM-in İqtisadiyyat, ticarət, texnologiya və ekologiya məsələləri üzrə komitəsinin sədri Katalin Zamfiranın çıxışı ilə yekun vurulub.