Azərbaycan və Orta dəhliz boyunca yerləşən ölkələr Asiya ilə Avropa arasında sabit nəqliyyat əlaqəsini təmin edir - BMTMM

Azərbaycan və Orta dəhliz boyunca yerləşən ölkələr regionda davam edən münaqişələr fonunda Asiya ilə Avropa arasında sabit nəqliyyat əlaqəsini təmin edir.

Bunu çərşənbə axşamı Beynəlxalq Münasibətlərin Təhlili və Multikulturalizm Mərkəzinin (BMTMM) İdarə Heyətinin sədri Fərid Şəfiyev Bakıda keçirilən "Orta Dəhliz və onun perspektivləri: Azərbaycan, Koreya və Avrasiya bağlantılarının gələcəyi" mövzusunda tədbirdə çıxışı zamanı bildirib.

Onun sözlərinə görə, son illərdə Azərbaycanın xarici siyasətində Şərq istiqamətinin əhəmiyyəti artır. Bu, beynəlxalq platformalar və təşkilatlar çərçivəsində də özünü göstərir.

"Azərbaycan mürəkkəb geosiyasi şəraitdə müxtəlif variantlar və alternativlər axtarır. Orta Dəhlizlə daşınan yüklərin həcminin artması bu marşruta tələbatın yüksəldiyini göstərir. Eyni tendensiya ticarətin artımında da müşahidə olunur.Azərbaycan Cənubi Koreya Respublikası ilə ikitərəfli münasibətlər çərçivəsində ticarət və investisiyaların inkişafı üçün yaxşı perspektivlər görür.Azərbaycan Koreya vətəndaşları üçün vizasız rejim tətbiq edib və bunun iki ölkə arasında turizm mübadiləsinin inkişafına töhfə verəcəyinə ümid edir", - deyə o bildirib.

F.Şəfiyev Azərbaycanın Asiyada Qarşılıqlı Fəaliyyət və Etimad Tədbirləri üzrə Müşavirə (AQEM), Türk Dövlətləri Təşkilatı, Cənub-Şərqi Asiya Ölkələri Assosiasiyası (ASEAN) və Şanxay Əməkdaşlıq Təşkilatı da daxil olmaqla, müxtəlif beynəlxalq əməkdaşlıq formatlarında iştirakını da qeyd edib.

Qeyd edək ki, Orta Dəhliz regionun bir sıra ölkələrindən keçən, Asiya ilə Avropanı birləşdirən nəqliyyat və ticarət marşrutudur. Bu, ənənəvi Şimal və Cənub dəhlizlərinə alternativdir.

Marşrut Çindən başlayır və Qazaxıstan, Özbəkistan və Türkmənistan kimi Mərkəzi Asiya ölkələrindən keçərək, Xəzər dənizi, Azərbaycan, Gürcüstan və Türkiyədən keçərək Avropaya çatır. Orta Dəhliz Asiyanın şərq bölgələrini, o cümlədən, Çini Avropa ilə birləşdirən, daha uzun dəniz yollarından yan keçməklə quru yolu təklif edir.