Milli təhlükəsizilik və kadr məsələləri – ATA NƏSİHƏTİ (3-cü yazı) – Cavid İsmayıl yazır

CAVİD  İSMAYIL

Əfəndilər! Türk tarixinə nəzər salsaq, ta qədim dövrlərdən etibarən əlimizə çatan mənbələrdən görürük ki, hökmdarlar, el ataları xalqına, elinə, obasına və öz oğullarına Vətən, dövlət əmanəti ilə bağlı nəsihətlər ediblər. Onu da qeyd edim ki, Dədə nəsihətləri türk xalqının mənəvi vəsiyyətidir. Hətta bu, eyni ilə məişət səviyyəsində də belə olub: sadə insanlar, el ağsaqqalları öz elinə, obasına, ailələrinə, o cümlədən oğullarına müxtəlif nəsihətlər ediblər ki, bu da hər kəsə məlumdur.
Mən bu yazıda hökmdarların və müdrik insanların dövlətçilik və Vətənlə bağlı bəzi 
nəsihətləri diqqətinizə çəkəcəyəm. Məsələn: "Ey Türk milləti, titrə və özünə dön, sən özünə dönəndə böyük olursan!" Türk dövlətçilik düşüncəsinin ən qədim nümunələrindən olan bu sözlərin sahibi Göytürk xaqanı Bilgə Kağandır  və  bu  onun   türk xalqına çağırışı - nəsihətidir.
Monqol imperiyasının banisi Çingiz xan oğullarına dövlətçiliyin qorunması üçün əsas əməl etməli olduqları prinsipləri - birliyin qorunmasını, daxili çəkişmələrdən uzaq durmağı, qanunlara sadiq qalmağı tövsiyə etmişdir. Onun bu nəsihətləri nəticəsində imperiya uzun müddət parçalanmadı.
Osmanlı dövlətinin qurucusu Osman Qazi oğlu Orxan Qaziyə ədalətdən ayrılmamağı, alimlərə və din adamlarına hörmət etməyi, dövləti genişləndirərkən haqqı qorumağı nəsihət etmişdir. Bu nəsihətlər Orxan Qazinin dövründə Osmanlı dövlətinin möhkəmlənməsində əsas rol oynamışdır.
Böyük sərkərdə və hökmdar Əmir Teymur oğlu Şahruxa elmi və alimləri qorumağı, şəhərləri dağıtmaq yox, abadlaşdırmağı  tövsiyə  etmiş və dövlətin əsasının ədalət olduğunu vurğulamışdır. Tarixdən bizə məlumdur ki, Şahruxun dövrü Teymurilərdə mədəni yüksəliş dövrü sayılır.
Səfəvi dövlətinin qurucusu Şah İsmayıl Xətai oğlu I Təhmasibə dövlətin qorunmasına, düşmənlərə qarşı ayıq-sayıq olmağa, daxili sabitliyi saxlamağa çağırmışdır. Təhmasib uzun müddət dövləti qorumağı bacarmışdır.
Nizami Gəncəvi oğlu Məhəmmədə "Sirlər xəzinəsi" və digər əsərlərində elm, əxlaq və zəhmətkeşlik barədə nəsihətlər etmişdir.
Eynilə türk xalqlarının dastanlarına nəzər salsaq, o cümlədən "Dədə Qorqud", "Alpamış", "Manas", "Koroğlu", "Er Tostik" dastanlarına, Boz Qurd əfsanələrinə (Göytürk), "Maaday-Kara", "Altay Buuçay" kimi əsərlərə baxsaq görərik ki, əsrlər keçməsinə baxmayaraq bu mənbələrdə bizə və bizdən gələcək nəsillərə ötürüləcək Dədə nəsihətləri yer almaqdadır.
Bütün bu sadaladığım dastanların ortaq xətti türk törəsinə sadiqlik, Vətənə sədaqət, Dədə yurda sahiblənmək, birlik, ağıl, səbr, el-oba namusu və s. kimi dəyərlərdir.
Əfəndilər!
Ən yaxın tariximizdən isə şanlı tariximizin 44 günlük şərəf tarixini yazaraq, 8 noyabr tarixində-Şuşanın işğalçılardan azad olunduğu gün ilk olaraq  Ali Baş Komandan - prezident  və eyni zamanda bir oğul kimi ümummilli liderin məzarını  ziyarət etdi və Heydər Əliyev ruhu qarşısında baş əyərək siyasi davamçısı kimi hesabatını verməklə bərabər bir igid kimi, ata qarşısında vəsiyyətini yerinə yetirən alnıaçıq bir oğul kimi "ATA, MƏN SƏNİN VƏSİYYƏTİNİ YERİNƏ YETİRDİM!" dedi!   Və bu   əslində XXI əsrdə,  əsrlərə dayanan Türk törəsinə sadiqlik nümunəsi olaraq, Dədə qarşısında verilən hesabat idi.
Bəli, Türk törəsinə sadiq və babaların nəsihətlərinə əməl edən bir sərkərdə və ata vəsiyyətini əməl edən oğul!
İndi məni dövlətimizin daima var olması və milli təhlükəsizliyi baxımından maraqlandıran və çox narahat edən başqa məsələdir.
Əfəndilər! 
Çağdaş tariximizin ən yaxın səhifəsinə nəzər salsaq  görərik ki, XX əsrin sonlarından etibarən sovet imperiyasına qarşı istiqlal savaşına başlayan qəhrəman xalqımız milli azadlıq hərəkatına qalxdığı zaman, o dövrdə Moskvanın müti qulları olan, Azərbaycanın müstəqilliyini istəməyən, SSRİ tərkibində kölə ruhlarına sadiq qalan adı özümüzdən olsa da, mənəviyyatı ləkəli olan qüvvələr, xalqın istiqlal hərəkatını boğmağa cəhd etdilər. Onlar xalqımızın bu Dədə ruhuna uyğun apardığı müqəddəs mübarizəyə qarşı açıq şəkildə savaş apardılar. Rus tankları Bakının küçələrində əliyalın insanlarımızı qan gölündə boğarkən belə, həmin qüvvələr bu tanklara az qala öz "ata ocaq"larından onların məkrli xislətlərinin müdafiəsi üçün gələn "xilas mələkləri" kimi rəğbət bəslədilər.
Ümummilli lider Heydər Əliyev Azərbaycanın müstəqilliyi uğrunda mübarizəyə qalxarkən onun və ailə üzvlərinin fiziki məhvinə belə cəhd göstərənlər oldu. Sovetlər dönəmində Heydər Əliyevin hesabına "kişi" olan,  sonradan isə  Vətənə xəyanət edən bu şəxslər Moskvanın diktəsi ilə yenidən ona qarşı çıxdılar, parlamentdə Naxçıvandan deputat kimi iştirak edərkən ayaqlarını yerə vuraraq onu boykot etdilər, ona qarşı bütün məkrli planlarını işə saldılar. Onlar sahibləri kimi yaxşı bilirdilər ki, Heydər Əliyev hakimiyyətə gəlsə, Azərbaycanı öz vassalıqlarında saxlaya bilməyəcəklər.  Heydər Əliyev hakimiyyətə qayıtdıqda isə sahiblərinin yanına qaçanlar da az olmadı.
İndi mənə maraqlıdır və bu məsələ məni çox düşündürür. Vətənə və onun müstəqilliyinə düşmən kəsilən bu insanlar Azərbaycanın ən ağır günlərində taladıqları vəsaitlərlə ölkədən qaçaraq övladlarını dünyanın ən tanınmış ali təhsil ocaqlarında oxutdular. Dövlətimizin humanizmi, cəmiyyətimizin unutqanlığı, eyni zamanda bu gün də müstəqilliyimizi həzm edə bilməyən qara qüvvələrin dəstəyi ilə zaman-zaman həmin çevrədən olan şəxslərin müxtəlif vəzifələrə sızmaları da istisna deyil.
İndi isə bir sual ortaya çıxır: onlar  da övladdırlar, onlar da öz atalarına və ata nəsihətlərinə sadiq-bağlıdırlar. Bəs zamanında Vətənə xəyanət edən, onun müstəqilliyinin əleyhinə çıxan, ümummilli lider Heydər Əliyevin qarşısını almağa çalışan həmin dədə-babalar öz övladlarına nəyi nəsihət ediblər? Dövlətə sədaqətli olmağı? Heydər Əliyev siyasətinə sadiq qalmağı? Prezident İlham Əliyevə sədaqət göstərməyi, yoxsa fürsət düşən kimi yenə xəyanət yolunu seçməyi?
Bu yazıda qədim türk tarixindəki tarixi şəxsiyyətlərin və türk dastanlarının verdiyi nəsihətlərin eyni ideya xətti üzərində formalaşdığı görünür. Bu xətt dövlətə - vətənə sədaqət, el-oba namusu, milli birliyin qorunması və gələcək nəsillər qarşısında məsuliyyət anlayışıdır. Bu ənənə müasir dövrdə də davam edir və Prezident İlham Əliyevin ata nəsihətinə sadiq qalaraq  Azərbaycanın  dövlət müstəqilliyini möhkəmləndirməsi bunun bariz nümunəsidir. Bu baxımdan sual açıq qalır: dünən dövlətin, xalqın, vətənin əleyhinə olanlar bu gün öz övladlarına hansı dəyərləri miras qoyublar? Nələri nəsihət ediblər? Tarix göstərir ki, millətlərin tarixi taleyi, dövlətin dayanıqlığı, dövlətin milli təhlükəsizliyi məhz bu sualın cavabında gizlidir.
Mənə isə şəxsən atamın nəsihəti - "Dövləti qoruyun" olub!
Əfəndilər, siz nə düşünürsünüz?

ARDI  VAR