“ŞƏT tərəfdaşı” statusu Azərbaycanın regional mövqeyini gücləndirir - ÖZƏL

"Azərbaycanın "ŞƏT tərəfdaşı" statusunu qazanması həm simvolik, həm də praktik baxımdan əhəmiyyətlidir. Bu, Bakının regional və beynəlxalq platformalarda daha aktiv rol oynama imkanı yaradır, xüsusilə Mərkəzi Asiya və Çin-Rusiya-Hindistan geosiyasətində balans siyasətini gücləndirir. Status həm də iqtisadi və nəqliyyat layihələrinin ŞƏT çərçivəsində daha geniş inteqrasiyasına şərait yaradır, Azərbaycan üçün tranzit, enerji və logistik üstünlükləri artırır". 

Bu fikirləri politoloq Tural İsmayılov Olaylar.az-a açıqlamasında söyləyib: 

"Eyni zamanda, bu inkişaf Qərb mediasının diqqətində narahatlıq doğurur, çünki Azərbaycan üçün alternativ əməkdaşlıq modellərinin formalaşması, Avropa və ABŞ-la balanslı münasibətləri daha incə diplomatik manevr tələb edir. Lakin Bakı üçün əsas məqam odur ki, ŞƏT tərəfdaşlığı Azərbaycan üçün yeni siyasi çeviklik və strateji manevr imkanları təqdim edir, regionda etimad və təhlükəsizlik mühitini gücləndirir.
Qısası, "ŞƏT tərəfdaşı" statusu Azərbaycanın regional rolunu yüksəldir, geosiyasi alternativləri genişləndirir və ölkənin strateji gücünü artırır". 

Zeynəb Mustafazadə