"İran parlamentinin Zəngəzur bəyanatı birbaşa Pezeşkiana qarşı təxribatdır!"
Məlum olduğu kimi İran parlamenti - İslam Məclisi - rəsmi bəyanat yayaraq bildirib ki, tanınmış sərhədlərin dəyişdirilməsi və ya "Zəngəzur dəhlizi" kimi layihələrin yaradılması regional ölkələrin təhlükəsizliyinə qarşıdır və kollektiv təhlükəsizliyə birbaşa təhdid yaradır .
Bəyanatda qeyd edilir ki, "Cənubi Qafqaz İran üçün yalnız coğrafi sərhəd deyil, həmçinin təhlükəsizlik perimetri, strateji dərinlik və sivilizasiya dairəsidir; bu regionla tarixi, mədəni və hərbi-siyasi əlaqələri var".
Həmçinin, İran BMT Nizamnaməsi və dövlətlərin ərazi bütövlüyü prinsiplərinə istinad edərək, hər hansı beynəlxalq tanınmış sərhəd dəyişikliklərinin dövlətlərin razılığı olmadan qanunsuz olduğunu vurğulayır
Tehran vəziyyətin gərginlik yaratmaması üçün regional ölkələr arasında "yaxşı qonşuluq prinsipi"nə əməl olunmasını, xarici dövlətlərin iştirakı olmadan regional əməkdaşlığın genişləndirilməsini vacib sayır.
Bundan başqa, İran Parlamentinin spikeri Məhəmməd Bağer Qalibaf "Zəngəzur dəhlizi" layihəsinin region xalqlarının maraqlarına zidd olduğunu və ümumi təhlükəsizliyə təhdid yaratdığını vurğulayıb; həmçinin Prezident Masoud Pezeshkian-ın bu məsələ ilə bağlı açıqlamasını İranın milli maraqlarına zərər verən bir addım kimi qiymətləndirib .
Bununla belə, 290 deputatdan 150-si bu bəyanata imza ataraq layihəyə etiraz edib və onu "regional xalqların maraqlarına qarşı və kollektiv təhlükəsizliyə birbaşa təhdid" adlandırıblar.
"İran parlamentinin Zəngəzur dəhlizi əleyhinə qəbul etdiyi bəyanat birbaşa öz Prezidentləri Məsud Pezeşkiana qarşı təxribatdır".
Olaylar.az bildirir ki, bu barədə politoloq Elxan Şahinoğlu feysbuk hesabında yazıb.
Politoloq xatırladıb ki, Pezeşkian Zəngəzur dəhlizinin əleyhinə olmadığını bir neçə dəfə səsləndirib, o Azərbaycanla əlaqələri inkişaf etdirməkdə maraqlı olduğunu söyləyib. Mühafizəkarlar isə tutduqlarını buraxmır, dəhlizin əleyhinə təxribatçı açıqlamalarını davam etdirirlər:
"İran parlamentinin bəyanatında Zəngəzur dəhlizinin "tanınmış sərhədlərin dəyişdirilməsi və zorla koridorların yaradılması" anlamına gəldiyi bildirilərək, bunun BMT Nizamnaməsinə zidd olduğu qeyd edilib. Əgər Zəngəzur dəhlizi iranlı deputatların söylədiyi kimi, Ermənistan sərhədlərinin dəyişdirilməsidirsə, bu ölkənin baş naziri Nikol Paşinyan niyə dəhlizin tikintisi və işlədilməsi təklifini qəbul edib? Ermənistan ərazisində dəmiryolu tikintisi nə vaxtdan BMT nizamnaməsinə ziddir?
Mühafizəkarlar dəhlizin tikintisinə mane ola bilməyəcəklər, onların əsas hədəfi Məsud Pezeşkiandır, bu cür "bəyanatlarla" onun qonşu dövlətlərlə münasibətləri normallaşdırmaq siyasətinə mane olmaq istəyirlər". (Musavat.com)