Moskvanın gizlətmək istədiyi həqiqət: 220 minə yaxın rus əsgəri həlak olub

2025-ci ilin avqustuna qədər Ukraynaya qarşı müharibədə həlak olan Rusiya hərbçilərinin sayı təxminən 219 min nəfərə çatıb.

Musavat.com xarici agentliklərə istinadən xəbər verir ki, "Meduza" və "Mediazona" mərkəzlərinin hesabları bunu göstərir.

Araşdırma aparan jurnalistlər miras işləri reyestrini təhlil edərək nəticəyə gəliblər ki, Rusiya ordusundakı itkilər ildən-ilə daha da artır. Belə ki, 2023-cü ildə təxminən 50 min, 2024-cü ildə isə artıq 93 min hərbçi həlak olub. 2024-cü ilin noyabrında həftəlik ölüm göstəricisi 3 min nəfərə qədər yüksəlib ki, bu da rekord göstərici hesab edilir.

Rusiyanın müharibədə həlak olan hərbçilərinin adbaad siyahısını aparan BBC-nin rus xidməti, "Mediazona" və könüllülərin məlumatına əsasən, 2025-ci ilin avqustunun sonuna olan rəsmi təsdiqlənmiş itki sayı 125 681 nəfərdir. Bununla belə, qeyd olunur ki, bu rəqəm bütün itkiləri əks etdirmir, çünki hər ölüm haqqında açıq mənbələrdə məlumat yayılmır.