Pakistan və Ermənistan arasında nə baş verir? – Bakının digər iki müttəfiqi də...
"Ermənistan İkinci Qarabağ müharibəsində Azərbaycana məğlub olduqdan və Qarabağı Azərbaycan ərazisi kimi tanıdıqdan sonra İrəvan diplomatik münasibətləri olmayan üç ölkə - Türkiyə, Səudiyyə Ərəbistanı və Pakistanla münasibətləri yoluna qoymağa çalışır".
Teleqraf xəbər verir ki, bunu politoloq Elxan Şahinoğlu deyib.
Ekspert bildirib ki, İrəvan Ankara ilə dialoqu İkinci Qarabağ müharibəsindən sonra intensivləşdirib, Baş nazir Nikol Paşinyan Türkiyə Prezidenti Rəcəb Tayyib Ərdoğanın dəvəti ilə İstanbulda onunla görüşüb:
"İki ölkənin dialoqa başçılıq edən rəsmiləri arasında təmaslar və müzakirələr davam edir. Dialoqa baxmayaraq, Ankara Ermənistanla diplomatik münasibətləri bərpa etməyə tələsmir.
Ermənistan rəsmiləri son illərdə bir neçə dəfə Səudiyyə Ərəbistanına da səfər edib Ər-Riyadın Ermənistanla diplomatik münasibətlər qurmasını təklif ediblər. Ər-Riyad İrəvana "yox" deməsə də, Ankara kimi tələsməməyə üstünlük verir.
Ermənistan Pakistan istiqamətində də fəallığını artırıb. Ermənistanın xarici işlər naziri Ararat Mirzoyanın avqunstun 29-da pakistanlı həmkarı Məhəmməd İshaq Darla telefon danışığı buna sübutdur. Nazirlər ölkələr arasında diplomatik münasibətlərin qurulması məsələsinə baxmağa razılaşıblar. Fikrimcə, İslamabad da Ankara və Ər-Riyad kimi Ermənistanla diplomatik münasibətləri bərpa etməyə tələsməyəcək.
Ermənistanla Azərbaycan arasında sülh sazişi imzalandıqdan sonra Türkiyə, Səudiyyə Ərəbistanı və Pakistan Ermənistanla diplomatik münasibətlər qurmağa qərar verəcəklər. Ankara, Ər-Riyad və İslamabad sülh sazişinin imzalanmasını gözləyəcək. Bu o deməkdir ki, bu üç ölkə Azərbaycanla müttəfiqliyə sadiqdir".
Elxan Şahinoğlunun fikrincə, bu, Nikol Paşinyana Azərbaycanla sülh sazişini imzalamağı sürətləndirmək və radikal müxalifəti susdurmaq üçün əlavə arqumentdir:
"Birinci addımda Ermənistan Konstitusiyasından Azərbaycana ərazi iddiasını ehtiva edən bənd çıxarılmalı, ikinci addımda sülh sazişi imzalanmalıdır, üçüncü addımda Azərbaycan, Türkiyə, Səudiyyə Ərəbistanı və Pakistan Ermənistanla diplomatik münasibətlər quracaqlar. Paşinyan birinci addımı atarsa, davamı gələcək və bu onun Ermənistanda mövqelərini gücləndirəcək".