Əli Mustafa: “Ukrayna xalqı torpaqlarını bölüşməyə heç vaxt razı olmayacaq” – ÖZƏL

"Hazırda Ukraynanın bölünməsi və ya Ukraynanın bölüşdürülməsi ideyası bir sıra ekspert dairələrində müzakirə olunur. Təbii ki, Ukrayna cəmiyyəti bu fikirlə razı deyil. Çünki bu, hər şeydən əvvəl bir bufer zonanın yaradılması, münaqişənin dondurulması və işğal olunmuş Ukrayna ərazilərinin qeyri-müəyyən müddətə Rusiyanın nəzarətində qalması deməkdir".

Bu sözləri Olaylar.az-a açıqlamasında siyasi şərhçi Əli Mustafa deyib. Siyasi şərhçi bildirib ki, artıq 4 ilə yaxındır ki, Ukrayna xalqı mübarizə aparır və bu savaşın əsas məqsədi odur ki, Ukrayna xalqı Rusiyanın təcavüzü ilə barışmaq istəmir. Onlar torpaqlarını azad etmək, sərhədlərinin toxunulmazlığını və ərazi bütövlüyünü bərpa etmək uğrunda mübarizə aparırlar. Düzdür, hələlik buna tam nail ola bilmirlər. Amma eyni zamanda Rusiya da ciddi uğurlar qazana bilməyib. Faktiki olaraq, o, çox cüzi - 1 faizdən də az ərazini işğal edə bilib. Əslində, Rusiyanın hərbi maşını sanki dayanıb, irəliləyə bilmir. Belə bir şəraitdə 40 km-lik bufer zonanın yaradılması Ukrayna xalqının azadlıq mübarizəsi ilə heç cür uzlaşmır. Əksinə, bu, Ukrayna ərazilərinin ən azı de-fakto itirilməsi ilə barışmaq anlamına gəlir.

Siyasi şərhçi qeyd edib ki, Avropanı da başa düşmək olar: o, Rusiyanın təhdidi ilə üz-üzədir və çox vaxt müharibədən yayınmaq istəyir. Çünki Avropa birbaşa Rusiya ilə qarşıdurmaya girmək istəmir. Belə ideyaların ortaya atılması isə əslində Rusiyanın maraqlarına xidmət edir. Çünki Rusiya işğal etdiyi əraziləri bir formada əlində saxlamağa çalışır. Halbuki Rusiyanın iştahı daha böyükdür: o, bəzən 5 vilayəti, bəzən bütün Donbası istəyir.

Siyasi şərhçinin fikrincə, Ukraynanın siyasi elitası belə bir təhlükəli ideya ilə razılaşmayacaq. Ümumiyyətlə, Avropa liderlərinin arada müzakirə etdiyi bir çox təkliflərin gerçəkləşmədiyini görürük. Daha real yol Ukraynaya hərbi dəstək vermək və Rusiyaya qarşı sanksiyaları gücləndirməklə bu yürüşü dayandırmaqdır. Məncə, Avropa dövlətləri də sonda bu nəticəyə gələcəklər. Hər halda bu müharibə Rusiyanı kifayət qədər zəiflətdi və əhəmiyyətli dərəcədə təcrid etdi. Belə bir şəraitdə Rusiyaya yenidən güclənmək üçün imkan tanımaq, üstəlik də Ukrayna torpaqları hesabına bufer zona yaratmaq Avropanın da maraqlarına uyğun deyil. Çünki, Almaniya kansleri Şoltsun da dediyi kimi, əgər bu savaş dayandırılarsa, Rusiya bundan istifadə edərək güclənəcək və növbəti hücumlara başlaya bilər. Bu hücumların isə artıq təkcə Ukraynaya deyil, Avropanın özünün bir sıra ölkələrinə yönəlmə ehtimalı var. Ona görə mən bu ideyanın ciddi perspektivinə inanmıram. 

"Avropanın təhlükəsizliyinə və siyasi balansına təsiri məsələsinə gəldikdə isə qeyd edə bilərəm ki, tərəflər bunu yalnız müvəqqəti dövr üçün düşünə bilərlər, strateji hədəf ola bilməz. Çünki nə Rusiya Avropa ilə Ukraynanı bölüşmək istəyir, nə də Avropa Rusiya ilə. Ukrayna xalqı isə heç vaxt torpaqlarını bölüşmək niyyətində deyil. Onlar öz ərazi bütövlüyü uğrunda mübarizə aparır, qurbanlar və şəhidlər verirlər. Buna görə də mən bu ideyanın real perspektivə sahib olduğunu ehtimal etmirəm. Əgər belə bir addım atılarsa, o yalnız müvəqqəti təhlükəsizlik yarada bilər. Ancaq tərəflərdən biri güclənən kimi sabitlik pozulacaq", - deyə Əli Mustafa əlavə edib. 

Siyasi şərhçi bildirib ki, siyasi güc balansına gəldikdə isə, hazırda yeni dünya düzəninin formalaşması prosesi müşahidə olunur və bu proses beynəlxalq münasibətlərə fərqli boyut verib. Siyasi balans çox tez dəyişə bilir. Burada əsas meyar döyüş meydanında kim üstünlük qazanırsa, onun həm hərbi, həm də siyasi iradəsi önə çıxır. Bu baxımdan, Ukraynada bufer zona yaradılması ideyasını uğurlu hesab etmirəm. Mənə elə gəlir ki, xüsusilə Ukrayna xalqı belə bir variantı qəbul etməyəcək. Nə baş verəcəyini isə zaman göstərəcək, amma bütün ehtimallar onu deməyə əsas verir ki, müharibə hələ davam edəcək.