Bakı vasitəçiliyi: Türkiyə–İsrail münasibətlərində Azərbaycanın artan nüfuzu - ÖZƏL
İsrailin Azərbaycandakı yeni səfiri Ronen Krauszu "Haqqın.az"a açıqlamasında Türkiyə-İsrail münasibətlərindəki gərginliyə toxunaraq, əlaqələrin bərpası üçün Bakının vasitəçiliyinin önəmini vurğulayıb. O bildirib ki, Azərbaycan sayəsində tərəflər çətin məsələləri, o cümlədən Suriyadakı vəziyyəti müzakirə edə biliblər. Prezident İlham Əliyev də "Əl-Ərəbiyyə"yə müsahibəsində Azərbaycanın bu istiqamətdə səylərinin davam edəcəyini, amma əsasən səssiz diplomatiyaya üstünlük veriləcəyini qeyd edib.
Hazırda Türkiyə ilə İsrail arasında münasibətlər ən gərgin dövrünü yaşayır. Azərbaycanın isə bu münasibətlərin normallaşması üçün atdığı addımlar təkcə dostluq və müttəfiqlik jesti deyil, həm də regionda məsuliyyətli mövqeyin təzahürüdür.
Türkiyə-İsrail münasibətlərində Azərbaycanın vasitəçilik rolu nə dərəcədə real nəticə verə bilər? Bu istiqamətdə Bakının uğuru regiondakı güc balansına və Azərbaycanın beynəlxalq imicinə necə təsir göstərə bilər?
Mövzu ilə bağlı politoloq İlyas Hüseynov Olaylar.az-a açıqlama verib:
" Türkiyə və İsrail arasında münasibətlərin formalaşması, inkişafı və dərinləşməsi Azərbaycanın marağındadır. Çünki biri bizim dostumuz, digəri hərbi-siyasi müttəfiqimizdir və hər iki dövlət arasında əməkdaşlıq, dostluq münasibətlərinin olması Azərbaycanın da gücünə güc qatır. Digər tərəfdən, Azərbaycan təkcə Cənubi Qafqazda deyil, həm də Mərkəzi Asiya və Yaxın Şərq siyasətində fəal rol oynamağa çalışır və Azərbaycanla Suriya arasında formalaşan münasibətlər də bunu sübut edir. Xüsusilə Suriya və Türkiyə, Türkiyə və İsrail, Suriya və İsrail arasında dialoqun genişlənməsində Azərbaycan vasitəçi rolunda çıxış edir və çox zaman bu vasitəçilik haqqında məlumatlar paylaşılmır. İlk dəfə Cənab Prezident İlham Əliyev bu barədə geniş ictimaiyyətə məlumat verdi və bütün bu danışıqlar qapalı saxlanılır. Hesab etmək olar ki, bu düzgün yanaşmadır, çünki bir sıra məsələlər ictimaiyyətə açıqlanmasa daha yaxşıdır. Yaxın Şərq çox həssas bölgədir və burada maraqlar bir-biri ilə toqquşur; mediasiya fəaliyyətini üzərinə götürən dövlətlərin azlığı da diqqət çəkir. Azərbaycan əslində çox çətin bir missiyanı icra edir və burada dialoq platformasına təşkil edir. Bu, Azərbaycanın beynəlxalq nüfuzunu artıran amildir və ölkənin beynəlxalq imicinə müsbət təsir göstərir, regiondakı gücünü artırır.
Azərbaycan sübut etməyə çalışır ki, nəinki bölgəmizdə, hətta daha böyük coğrafiyada sülhü təmin edə bilər. Azərbaycan öz ərazi bütövlüyünü və suverenliyini təmin etdikdən sonra beynəlxalq arenada ölkəmizə münasibət dəyişib və müsbət mənada bir sıra çalarları görürük. Cənab Prezident İlham Əliyevi xüsusi qonaq kimi bir sıra samitlərdə, forumlarda görmək istəyirlər. Çünki Azərbaycanın deməyə sözü vardır, Azərbaycanın gördüyü işlər hər kəs üçün nümunədir və öz torpaqlarını işğaldan azad edən dövlət hər zaman nümunə olaraq göstərilir. Bununla yanaşı, Azərbaycan həm də münaqişə meyilləri olan qüvvələrin konstruktiv dialoqa dəvət olunmasında da çox sürətlə iştirak edir".
Zeynəb Mustafazadə