“Azərbaycanın AŞPA-dan kənarda qalması nə ölkəyə, nə də Cənubi Qafqaza zərər vermir” – Elçin Xalidbəyli – ÖZƏL

"Azərbaycanın Avropa Şurası Parlament Assambleyasından kənarda qalması Cənubi Qafqaz üçün ciddi problem yaratmır və eyni zamanda Azərbaycanın özünə də hər hansı bir ciddi zərər vermir".

Bu sözləri Olaylar.az-a açıqlamasında siyasi şərhçi Elçin Xalidbəyli deyib. Siyasi şərhçi bildirib ki, AŞPA heç bir təsir mexanizmi olmayan, sadəcə siyasi müzakirə klubudur: "Onun real qərar qəbul etmək səlahiyyəti yoxdur, dövlətlər üzərində öhdəliklər qoymur və bundan başqa heç bir funksiyası yoxdur.

Ən əsası budur ki, AŞPA indiyədək fəaliyyət dövründə heç bir müsbət nəticə əldə etməyib, problemlərin həllində rol oynamayıb. Əksinə, qərəzli mövqelərdən çıxış edərək müxtəlif dövlətlərə təzyiq göstərmək alətinə çevrilib. Erməni diasporu və Avropadakı bəzi dövlətlər də bu qurumu alətə çevirərək rəqib ölkələrə, o cümlədən Azərbaycana təzyiq vasitəsi kimi istifadə edirdilər. Artıq bu təzyiq vasitəsi mövcud deyil".

"Azərbaycan bundan heç nə itirməyib. Əksinə, Avropa Şurası Parlament Assambleyası Azərbaycanı itirib. Çünki Azərbaycan güclü dövlət olmaqla yanaşı, enerji resursları ilə zəngin, Cənubi Qafqazın əsas siyasi iradə mərkəzidir və onunla münasibətlərin korlanması daha çox bu qurumun özünə zərər vura bilər. Bunun əsas təsirləri nə Azərbaycana, nə də Cənubi Qafqaza deyil, məhz Avropa Şurası Parlament Assambleyasına olacaq. Azərbaycan heç bir zərər görmür. Digər tərəfdən, Azərbaycanın beynəlxalq gücü tamamilə fərqli faktorlarla müəyyən olunur və Avropa Şurası Parlament Assambleyasının bu məsələyə heç bir təsiri yoxdur", - deyə siyasi şərhçi vurğulayıb.

E. Xalidbəyli qeyd edib ki, Azərbaycan güclü ordusu, güclü iqtisadiyyatı, zəngin enerji resursları və Rəsmi Bakının, Prezident İlham Əliyevin qətiyyətli, prinsipial siyasi mövqeyi ilə qlobal məkanda öz mövqelərini möhkəmləndirir və bunu davam etdirəcək. Ən əsası isə Azərbaycanın beynəlxalq münasibətləri iki tərəfli əlaqələr sistemi əsasında formalaşır.

Siyasi şərhçi əlavə edib ki, Azərbaycanın Avropa İttifaqı ilə çox yaxın münasibətləri var. Avropa İttifaqı Azərbaycanın strateji tərəfdaşıdır və enerji təhlükəsizliyi sahəsində mühüm əməkdaşlıq həyata keçirilir. Hazırda Azərbaycanın Avropanın enerji resursları ilə təmin edilməsində avangard rolu var. Bu baxımdan Avropa Şurası Parlament Assambleyasının Cənubi Qafqazdakı qüvvələr balansına təsiri sıfırdır. Azərbaycanın münasibətləri həm Qərb, həm Şərq ölkələri, Avropa dövlətləri, NATO ölkələri, eləcə də Şanxay Əməkdaşlıq Təşkilatı və Orta Asiya dövlətləri ilə çox yaxın iqtisadi-siyasi əlaqələrə əsaslanır.

Sevda Dəniz