Azərbaycan regional sabitliyin tərəfdarıdır
Azərbaycan Respublikasının Prezidenti cənab İlham Əliyevin 26 avqust 2025-ci ildə Səudiyyə Ərəbistanının nüfuzlu "Əl-Ərəbiyə" telekanalına verdiyi müsahibə həm regional, həm də beynəlxalq miqyasda böyük maraq doğurmuşdur. Bu müsahibə yalnız Azərbaycanın xarici siyasət kursunun əsas istiqamətlərini təqdim etməklə kifayətlənməmiş, eyni zamanda ölkənin Cənubi Qafqazda artan rolunu və beynəlxalq münasibətlərdə mövqeyini bir daha nümayiş etdirmişdir.
Müsahibənin ən mühüm tərəflərindən biri Prezident İlham Əliyevin Ermənistanla aparılan sülh prosesinə verdiyi əhəmiyyətli mesajlar idi. Dövlət başçısı açıq şəkildə vurğuladı ki, Azərbaycan sülhün bərqərar olunması üçün əsas təşəbbüskar tərəfdir və regionun gələcək inkişafı məhz bu razılaşmaların uğurla həyata keçirilməsindən asılıdır. Ermənistanın konstitusiyasına düzəlişlərin zəruriliyi məsələsi Azərbaycanın ərazi bütövlüyünün tanınmasının vacibliyini ortaya qoyur. Bu isə beynəlxalq ictimaiyyətə Azərbaycanın sülhsevər, lakin prinsipial mövqeyini nümayiş etdirir.
Prezident İlham Əliyevin Zəngəzur dəhlizi və Araz marşrutu barədə verdiyi açıqlamalar müsahibənin strateji əhəmiyyətini daha da artırdı. Bu layihələr regionda kommunikasiya əlaqələrinin bərpasına, yeni iqtisadi körpülərin qurulmasına xidmət edir. Xüsusilə, Naxçıvanın Azərbaycanın əsas hissəsi ilə birləşdirilməsi həm ölkədaxili iqtisadi inkişaf, həm də beynəlxalq tranzit marşrutlarının genişlənməsi baxımından böyük əhəmiyyət kəsb edir.
"Əl-Ərəbiyə" kimi nüfuzlu ərəb telekanalına müsahibə vermək Azərbaycanın Yaxın Şərq ölkələri ilə əlaqələrinin gücləndirilməsi baxımından mühüm addımdır. Prezidentin çıxışı ərəb dünyasına birbaşa ünvanlanmış mesaj idi və bu, Azərbaycanın müsəlman ölkələri ilə birliyi, həmrəylik prinsiplərinə sadiqliyinin göstəricisi oldu. Eyni zamanda, müsahibə Azərbaycanın enerji, iqtisadi əməkdaşlıq və təhlükəsizlik sahələrindəki mövqelərinin ərəb ictimaiyyətinə çatdırılmasına imkan yaratdı.
Müsahibədə Azərbaycanın keçmişinə dair edilən açıqlamalar, xüsusilə 1920-ci ildə Sovet işğalının qeyd olunması, Azərbaycanın tarixi ədalət uğrunda mübarizəsini bir daha gündəmə gətirdi. Bu, həm də ölkənin müstəqillik, suverenlik və milli maraqlar mövzusunda güzəştə getməyəcəyinin açıq mesajı idi.
Prezident İlham Əliyevin "Əl-Ərəbiyə" telekanalına müsahibəsi Azərbaycanın beynəlxalq informasiya məkanında mövqeyini gücləndirən əhəmiyyətli hadisə kimi qiymətləndirilə bilər. Bu müsahibə bir tərəfdən Cənubi Qafqazda sülh və əməkdaşlıq çağırışlarını gündəmə gətirdi, digər tərəfdən isə Azərbaycanın regional layihələrdə lider mövqeyini təsdiqlədi. Ən əsası, müsahibə beynəlxalq ictimaiyyətə Azərbaycanın həm regional sabitlik, həm də qlobal enerji təhlükəsizliyində mühüm rol oynadığını bir daha göstərdi.
Əminə Ağazadə
Milli Məclisin deputatı