Azərbaycanın AŞ PA-dan çıxışı: Milli maraqların və suverenliyin qələbəsi - ÖZƏL
"Avropa Şurası Parlament Assambleyası (AŞ PA) illərdir ki, obyektivlikdən uzaq, ikili standartların mərkəzinə çevrilib. Azərbaycan nümayəndə heyətinin səsvermə hüququnun dayandırılması bunun bariz nümunəsidir. 76 nəfərin lehinə, 10 nəfərin əleyhinə verdiyi səs, əslində, hüquqi prinsiplərin deyil, siyasi maraqların nəticəsidir. Ən acınacaqlısı isə odur ki, Avropa Şurası kimi qurumlar insan haqları və demokratiya adı altında seçici yanaşma tətbiq edirlər - Ermənistanın işğalçılıq siyasəti illərlə görməzlikdən gəlinir, amma Azərbaycan müstəqil siyasət apardığı üçün həzm edilmir".
Bu fikirləri politoloq Tural İsmayılov Olaylar.az-a açıqlamasında söyləyib. Politoloq qeyd edib ki, Azərbaycan nümayəndə heyətinin qurumdakı fəaliyyətini dayandırması tamamilə haqlı və prinsipial addımdır:
" Çünki ədalətsiz platformada qalmaq, sadəcə, Avropanın "demokratiya dekorasiyası"nda fiqur rolunu oynamaq demək idi. Gürcüstanın da oxşar qərar verməsi göstərdi ki, məsələ təkcə Azərbaycanla bağlı deyil, region ölkələri Avropanın ikili standartlarından ciddi şəkildə narazıdırlar. Azərbaycan bu addımı ilə itirmir, əksinə qazanır. Qazanır, çünki Avropaya açıq mesaj verir: "Bizimlə ya bərabərhüquqlu tərəfdaş kimi davranın, ya da qapılarınızı özünüzə saxlayın." Azərbaycanın siyasi çəkisi və iqtisadi gücü AŞ PA-dan qat-qat böyükdür. Bakı enerji resursları, geosiyasi mövqeyi və artan beynəlxalq nüfuzu ilə Avropanın ehtiyac duyduğu ölkədir. Ona görə də Azərbaycan AŞ PA-dan yox, AŞ PA Azərbaycandan daha çox asılıdır. Gürcüstan və Azərbaycan bu qurumdan ayrılmaqla öz milli maraqlarını müdafiə etdiklərini nümayiş etdirdilər. İtki deyil, əksinə, suverenliyin möhkəmləndirilməsi baş verdi. Avropa Şurasının formatı isə getdikcə dəyərsizləşir, çünki Cənubi Qafqazın iki əsas ölkəsi oradan çəkilib. İndi AŞ PA-da regiondan yalnız Ermənistanın qalması nəyi dəyişəcək? Əslində heç nə. Ermənistanın təklənmiş çıxışları, anti-Azərbaycan ritorikası heç bir real siyasi nəticə doğurmayacaq. Əksinə, bu balans regionun xeyrinədir: Ermənistan "yalnız qalan şikayətçi" obrazında qalır, Azərbaycan və Gürcüstan isə öz milli maraqlarını qoruyan müstəqil dövlətlər kimi görünürlər. Bir sözlə, AŞ PA-nın qəbul etdiyi qərar onun özünə zərbədir, Azərbaycanın isə siyasi iradəsinin, müstəqillik xəttinin təsdiqidir. Azərbaycanın gücü Avropa salonlarında deyil, regional və qlobal siyasətdəki təsirindədir".
Zeynəb Mustafazadə