" Azərbarcanın ŞƏT-ə üzvlüyü region iqtisadiyyatına və nəqliyyat imkanlarına mühüm töhfə verəcək" - Elşad Həsənov - ÖZƏL
Ermənistan XİN başçısı Ararat Mirzoyan bildirib ki, həm Ermənistan, həm Azərbaycan ŞƏT-ə üzvlük üçün müraciət edib. Sammit avqustun 31-dən sentyabrın 1-dək Tyançzində keçiriləcək.
Mövzu ilə bağlı politoloq Elşad Həsənov Olaylar.az-a açıqlama verib:
" Şanxay Əməkdaşlıq Təşkilatı 15 iyun 2001-ci ildə yaradılıb. Bu təşkilata Rusiya, İran, Qazaxıstan, Qırğızıstan, Çin, Tacikistan, Hindistan, Pakistan, Özbəkistan və Belarus üzvüdür. Müşahidəçi statusuna malik ölkələr arasında Əfqanıstan və Monqolustan var. Dialoq üzrə tərəfdaş ölkələr arasında isə Azərbaycan, Türkiyə, Ermənistan, Kamboca, Nepal, Misir , Səudiyyə Ərəbistanı, Myanma, Birləşmiş Ərəb Əmirlikləri, Küveyt və Şri Lanka yer alır. Azərbaycan 2015-ci iyulun 10-da Şanxay Əməkdaşlıq Təşkilatının Dövlət Başçıları Şurasında Azərbaycan Respublasını ŞƏT-də dialoq üzrə tərəfdaş statusunun verilməsi haqqında qərar qəbul edilib. 2016-cı ildən əməkdaşlıq edirik. Azərbaycanın Şimal-Cənub və Şərq-Qərb dəhlizlərinin üzərində yerləşməsi inkişaf edən nəqliyyat infrastrukturu baxımından bu təşkilat üçün böyük əhəmiyyət daşıyır. 2024-cü ildə Şanxay Əməkdaşlıq Təşkilatının Astananada sammiti keçirilib. Sammitdə "ŞƏT plyus" formatında keçirilmiş görüşdə Azərbaycan Respublikasının Prezidenti iştirak edib. Azərbaycan Çin-in "Bir kəmər, bir yol" təşəbbüsünü dəstəkləyən ilk ölkələrdən biridir. Azərbaycanın malik olduğu iqtisadi və nəqliyyat imkanları həmin təşəbbüsün həyata keçirilməsinə böyük töhfələr verir. Səmərqənd şəhərində keçirilən Sammitdə Azərbaycan Respublikasının Prezidenti Cənab İlham Əliyev qeyd edib ki, Zəngəzur dəhlizinin açılması region ölkələrinin nəqliyyat imkanlarını artıracaq və bu, regiondakı bütün ölkələr üçün faydalı olacaq. Bu səbəbdən Ələt limanının daşıma qabiliyyəti artırılıb və bu sahədə böyük işlər görülür. Şanxay Əməkdaşlıq Təşkilatı heç bir bloka qoşulmamaqla bir-birindən sülh, əməkdaşlıq və iqtisadi gücü artırmaq məqsədini daşıdığı üçün Azərbaycan da bu təşkilata üzv olmaq istəyir. Çində keçiriləcək bu Sammitdə Azərbaycanın üzvlük məsələsinə baxılması gözlənilir. Ermənistanın da həmin tədbirdə iştirakı mümkündür.
Bu təşkilat üzv ölkələrin ticari əlaqələrini və iqtisadi bağlarını gücləndirir, regionda sülh və sabitliyə töhfə verir və geosiyasi balansda müsbət təsir göstərir. Azərbaycan Prezidentinin tədbirdə iştirak edəcəyi artıq təsdiqlənib və bir çox siyasi məsələlər gündəmdə olacaq. Son zamanlar Azərbaycan-Rusiya münasibətlərində soyuqluq yaranıb. Bu, Azərbaycan tərəfi tərəfindən deyil, qarşı tərəfdən baş verib. Bu münasibətlər heç bir tərəfə fayda vermir, Azərbaycanın haqlı tələbləri yerinə yetirilməlidir. Hazırda Rusiya çətin vəziyyətdədir və Qərbin sanksiyaları altındadır. Onun əsas malları Azərbaycandan daşınır . Bu baxımdan, Sammit çərçivəsində Rusiya və Azərbaycan liderlərinin görüşü də mümkün ola bilər. Şanxay Əməkdaşlıq Təşkilatında Azərbaycanın üzvlüyü ölkənin iqtisadi imkanlarını artıracaq, böyük tranzit yollarının üzərində mövqeyini gücləndirəcək və Zəngəzur dəhlizinin işə düşməsi yaxın gələcəkdə daha mühüm rol oynamasına səbəb olacaq".
Zeynəb Mustafazadə