Bakı və Bişkək arasında yeni əməkdaşlıq imkanları

Strateji Tərəfdaşlıq haqqında Bəyannamə Azərbaycanla Qırğızıstan arasındakı qardaşlıq və dostluq əlaqələrini daha da möhkəmləndirəcək

Onsuz da yeraltı-yerüstü sərvətləri, eləcə də həyata keçirdiyi prinsipial siyasəti  ilə Cənubi Qafqazın cəlbedici ölkəsi kimi xarakterizə edilən, böyük maraq kəsb edən Azərbaycana 44 günlük Vətən müharibəsindən sonra diqqət daha da artıb. İndi əvvəlkindən daha çox ölkə regionda Azərbaycanla sıx əməkdaşlığa üstünlük verir, rəsmi Bakı ilə münasibətləri yeni mərhələyə qaldırmaq istiqamətində səy göstərirlər. Bu istiqamətdə Mərkəzi Asiya respublikalarının da Azərbaycana olan marağı özünü daha qabarıq şəkildə büruzə verir. Həm Azərbaycan Prezidenti İlham Əliyevin Orta Asiya respublikalarına rəsmi səfərə dəvət edilməsi, həm də region ölkələrin liderlərinin Azərbaycana səfərləri fonunda bunu aydın görmək mümkündür. Elə bu günlərdə Qırğızıstan prezidenti Sadır Japarovun Azərbaycan rəsmi səfəri də məhz ölkəmizə olan beynəlxalq və regional maraqdan irəli gəlirdi.

Milli Məclisin deputatı Məlahət İbrahimqızı Qırğızıstan prezidentinin Azərbaycana səfərinə münasibət bildirərkən qeyd edib ki, bu  səfəri öz siyasi əhəmiyyətinə görə bugünədək Azərbaycan-Qırğızıstan arasında olan bütün səfərlər arasında ən yüksək səviyyədə olan səfərlərdən hesab etmək olar. Onun sözlərinə görə, mətbuatdan da gördüyümüz kimi,  dostluğumuzun və qardaşlığımızın ifadəsi olan bu səfər çərçivəsində  bir sıra çox mühüm sənədlər, eləcə də yüksək strateji tərəfdaşlıq sənədi imzalanmışdı: "Bununla bərabər bir sıra çox digər önəmli sənədləri də imzalanmışdır. Səfər çərçivəsində imzalanmış bu sənədlər ölkələrimizin gələcək əlaqələrini Liderlərimizin siyasi iradəsi ilə daha da intensivləşdirəcəkdir və buna tam hüquqi  zəmin yaratdı. Daha dəqiq desək imzalanmış yüksək strateji tərəfdaşlıq  sənədi ölkələrimizin münasibətlərini keyfiyyətcə yeni səviyyəyə çatdırdı. Sözsüz ki, həm Strateji Tərəfdaşlıq haqqında Bəyannaməni və Dövlətlərarası Şuranın yaradılması haqqında Memorandum böyük siyasi əhəmiyyəti əks  etdirir. Həm Strateji tərəfdaşlıq həm  də, Dövlətlərarası Şura çərçivəsində bu iki ölkənin ikitərəfli tərəfli fəaliyyətini eləcə də,  regional və beynəlxalq məsələlərin daha  səmərəli və çevik şəkildə kordinə olunmasının hüquqi bazasıdır".

Millət vəlkili bildirib ki, Qırğızıstan və Azərbaycan bütün beynəlxalq təşkilatlarda, daha doğrusu çoxtərəfli əməkdaşlıqda da hər zaman bir-birini dəstəkləyir: "Belə ki, ötən dövr ərzində bu iki dost və qardaş dövlət və onların təmsilçiləri  BMT, ATƏT, İslam Əməkdaşlıq Təşkilatı, Türk Dövlətləri Təşkilatı, ECO , Şanxay təşkilatı çərçivəsində həmişə bir-birini  dəstəkləyir. Azərbaycanın Qoşulmama Hərəkatındakı sədrlik müddətinin uzadılmasında Qırğızıstanın bir mənalı olaraq açıq dəstək vermişdir".

Məlahət İbrahimqızı diqqətə çatdırıb ki,  iki dövlət başçısının keçirdiyi mətbuat konfransında möhtərəm Prezidentimiz bu hadisəni minnərdarlıqla qeyd etdi: "Xüsusi vurğulamaq istərdim ki, iki ölkə arasındakı siyasi,  iqtisadi, mədəni əlaqələrin, eləcə də bu sahələr üzrə əməkdaşlığın vacibliyi, güclənməsi və daha da genişləndirilməsi və perspektivləri möhtərəm Prezidentimiz tərəfindən  mətbuat konfransındakı çıxışında yer alır. İki ölkənin gələcək yol xəritəsinin istiqamətləri olan bu çıxışda Azərbaycanın nəqliyyat infrastruktur sahəsində əldə etdiyi nailiyyətlərə, uğurlara, onun  beynəlxalq əhəmiyyəti haqqında önəmli fikirlər də səsləndirilmişdir. Sözsüz ki,  unikal layihə olan Şərq-Qərb nəqliyyat dəhlizi haqqında danışarkan Zəngəzur dəhlizinin də nə qədər böyük əhəmiyyətə malik olması istisna deyil. Qürurla deməliyik ki, möhtərəm Prezidentimizin uzaqgörən siyasətinin nəticəsində ölkəmizdə  yüklərin bütün istiqamətlərə həm Şimala, həm Cənuba, həm də Qərbə göndərilməsinə imkan verən müasir nəqliyyat infrastrukturu yaradılıb. Yol, nəqliyyat infrastruktur layihələri həm də insanları mənzil başına çatdıran, könülləri birləşdirən dostları qovuşduran vasitədir. Sözsüz ki, Azərbaycanla Qırğızıstan arasında imzalanmış bu sənədlər qardaş və dost ölkə kimi Qırğızıstanın da bu imkanlardan istifadə etməsinə geniş imkan yaradır. Bir mənalı olaraq vurğulamalıyam ki, ölkələrimizin bütün sahələr üzrə sürətlə və sıx əməkdaşlığı həm  də bütövlükdə TDT-Türk Dövlətlər Təşkilatının daha da güclənməsinə xalqlarımız arasında inteqrasiya prosesinə də öz töhfəsini verəcəkdir. Ortaq tariximiz, mədəni irsimiz, dilimiz, dinimiz, adət və ənənələrimiz. eyni kökə və eyni etnosa mənsub olmamız bu əlaqələri daha möhkəm edəcəkdir. Məhz Azərbaycanın qədim Şuşa şəhərinin gələn il türk dünyasının mədəniyyət paytaxtı elan olunması təşəbbüsünün qardaş  Qırğızıstan tərəfindən dəstəklənməsi də bu zərurətdən qaynaqlanır.  Bir daha qeyd etmək istəyirəm ki, imzalanmış bütün sənədlər xüsusən də ən əsas sənəd olan Strateji Tərəfdaşlıq haqqında Bəyannamə Azərbaycanla Qırğızıstan arasındakı qardaşlıq və dostluq əlaqələrini daha da möhkəm edəcəkdir".

Füzuli