Rəşad Sadiqov: “Sanki neçə ildir, burada oynayıram”

Qış fasiləsində "Qəbələ"yə qoşulan Rəşad Sadiqov artıq komanda ilə Antalya toplanışının 2-ci gününü geridə qoyub. Təcrübəli yarımmüdafiəçi yeni klubu və hazırlıq prosesi ilə bağlı təəssüratlarını klubun rəsmi saytına bildirib. Sadiqov artıq kollektivə uyğunlaşdığını, özünü komandada yeni hiss etmədiyini bildirib: "Yeni komandamda çox isti qarşılandım. Sanki neçə ildir bu komandada oynayıram. Komandaya uyğunlaşmaqda heç bir çətinlik olmadı. Heyətdə bir neçə futbolçu var ki, onlarla Azərbaycan millisində çiyin-çiyinə mübarizə aparırıq. Digər yerli futbolçuların hamısı ilə də öncədən yaxşı münasibətlərimiz var". Yarımmüdafiəçi Antalya toplanışındakı hazırlıqlar və baş məşqçi Roman Qriqorçuk haqda da fikirlərini açıqlayıb: "O, futbolçularla yaxşı anlaşır, ünsiyyət qurur. Bir insan kimi yüksək keyfiyyətlərə malikdir. Hər gün iclas keçirib, bizimlə söhbət edir. Yəqin ki, yaxın günlərdə oyun planındakı düşüncələrini də bizimlə bölüşəcək". ("OLAYLAR" İA)