Çindən Qərb müdafiə sənayesinə qarşı sərt addım: Qiymətlər 5-6 dəfə artdı

Çin Qərb müdafiə şirkətlərinin ehtiyac duyduğu əsas mineralların ixracına ciddi məhdudiyyətlər qoyub. 

Olaylar.az Wall Street Journal-a istinadən xəbər verir ki, onlar ölkədən kənarda alternativ mənbələr axtarmaq məcburiyyətində qalıblar.

Nəşr qeyd edir ki, nadir torpaq metallarının və maqnitlərin tədarükünün azalması silah və texnikanın - sursatdan tutmuş pilotsuz təyyarələrə və qırıcılara qədər istehsalında gecikmələrə səbəb olur. ABŞ-ın bir dron istehsalçısı Çin komponentləri üçün əvəz axtararkən sifarişləri həftələrlə gecikdirmək məcburiyyətində qalıb.

Treyderlər deyirlər ki, bəzi əsas materialların qiymətləri Pekinin məhdudiyyətləri səbəbindən müharibədən əvvəlki səviyyədən beş dəfə və ya daha çox artıb. ABŞ silahlarında istifadə edilən 80.000-dən çox hissədə Çin ixrac nəzarətinə tabe olan minerallar var, demək olar ki, bütün təchizat zəncirləri Çin tədarükçülərindən asılıdır və ABŞ-ın müdafiə sənayesi üçün ciddi risklər yaradır.

Çin həmçinin Qərb şirkətlərindən aldıqları faydalı qazıntıların hərbi məqsədlər üçün istifadəsinin qarşısını almaq üçün onların istifadəsi haqqında ətraflı məlumat vermələrini tələb edir.

Aprelin əvvəlində Çinin Ticarət Nazirliyi 16 ABŞ şirkətini ixrac nəzarəti siyahısına əlavə edərək, ikili təyinatlı malların daşınmasını məhdudlaşdırıb. "New York Times" qəzetinin məlumatına görə, Pekin avtomobillər, dronlar, robotlar və raketlərin istehsalı üçün lazım olan kritik mineralların və maqnitlərin ixracını dayandırıb.

İyun ayında Wall Street Journal Çinin Amerika avtomobil istehsalçılarına və sənaye müəssisələrinə nadir torpaq metalları üçün ixrac lisenziyalarının verilməsini qismən bərpa etdiyini, lakin belə icazələrin şərtlərinin altı ay ilə məhdudlaşdığını bildirdi. Bununla belə, hərbi texnika üçün ixtisaslaşmış maqnitlərin ixracı ciddi nəzarət altında qalır.