Dünya ölkələri Avropa İttifaqı ilə əməkdaşlıq üçün növbəyə düzülür – Ursula fon der Leyen- ÖZƏL

Avropa Komissiyasının rəhbəri Ursula fon der Leyenin sözlərinə görə, ABŞ prezidenti  Donald Trampın tətbiq etdiyi idxal rüsumları dünya bazarlarını kökündən dəyişdirdikdən sonra bir çox ölkə Avropa İttifaqı ilə daha sıx ticarət əlaqələri qurmaqda maraqlı olduqlarını bildiriblər. Olaylar.az xəbər verir ki, bu barədə o, POLITICO nəşrinə müsahibəsində danışıb.
"Getdikcə daha da qeyri-sabit hala gələn qlobal vəziyyətdə ölkələr bizimlə işləmək üçün növbəyə düzülürlər", - deyə Fon der Leyen bildirib. O, Trampın adını çəkməsə də, ABŞ-nin yeni ticarət siyasətinə açıq istinad edib.
Son həftələrdə fon der Leyen İslandiya, Yeni Zelandiya, Malayziya, Filippin, Kanada, Hindistan və Birləşmiş Ərəb Əmirliklərinin liderləri ilə görüşlər keçirib. Bu ölkələr güclü və etibarlı tərəfdaşlar axtardıqlarını bəyan ediblər.
Avropa Komissiyasının rəhbəri dünya düzəninin "soyuq müharibədən sonra heç vaxt olmadığı qədər dərin şəkildə dəyişdiyini" vurğulayıb. Onun sözlərinə görə, bu qeyri-müəyyənlik fonunda Avropa İttifaqına olan etimad artır - təkcə hökumətlər deyil, vətəndaşlar arasında da.
Fon der Leyen Eurobarometer sorğusuna istinad edərək bildirib ki, Aİ üzvlüyünə dəstək 74%-ə çatıb - bu, son 40 ilin ən yüksək göstəricisidir.
"Bu fakt çox şeyi deyir. Xaosun içində Avropa sabit dayanır, dəyərlərinə söykənir və gələcəyi formalaşdırmağa hazırdır", - deyə o əlavə edib.
Qeyd edək ki, aprelin 2-də Donald Tramp 185 ölkə və əraziyə qarşı idxal rüsumları tətbiq edəcəyini açıqlayıb. Əksər ölkələr üçün bu rüsum 10% səviyyəsində olsa da, Avropa İttifaqı üçün bu göstərici 20%-dir. Aprelin 9-da isə Tramp danışıqlara hazır olduqlarını bildirən 75 ölkəyə münasibətdə rüsumların artırılmasını 90 günə qədər təxirə salacağını elan edib. Bu ölkələr üçün 10%-lik idxal rüsumu qüvvədə qalacaq. ABŞ lideri həmçinin rüsumların səviyyəsinin müzakirəyə açıq olduğunu bəyan edib və üç aylıq fasilənin uzadılmasını da istisna etməyib.