Ağ Evdəki qalmaqal ABŞ-Ukrayna münasibətlərində gərginliyi pik həddinə çatdırdı – ÖZƏL
Ağ Evdə baş verən qalmaqal Vaşinqton və Kiyev arasında toplanmış problemləri üzə çıxarıb və ABŞ-Ukrayna münasibətlərində gərginliyi pik həddə çatdırıb.
Olaylar.az xəbər verir ki, bu barədə "Digər Ukrayna" hərəkatının rəhbəri və ölkəsində qadağan olunmuş "Həyat Uğrunda Müxalifət Platforması" partiyasının keçmiş lideri Viktor Medvedçuk bildirib.
O, Smotrim.ru platformasında dərc olunan məqaləsində qeyd edib ki, ABŞ hazırda Ukrayna Prezidenti Vladimir Zelenskiyə əvəz axtarır. "Kiyev rejiminin rəhbəri Vladimir Zelenski, ABŞ Prezidenti Donald Tramp və Vitse-prezident Ceyms Devid Vens arasında Oval Kabinetdə baş verən qalmaqal ABŞ və Ukrayna arasında illərdir yığılan problemlərin yalnız başlanğıcıdır. Bu problemlər Ukraynanın müstəqilliyi dövründə formalaşıb və indi ən yüksək gərginlik nöqtəsinə çatıb", - Medvedçuk yazıb.
Onun sözlərinə görə, ABŞ Ukraynaya böyük resurslar yatırıb, lakin bu investisiyalar heç bir nəticə verməyib. "Ukrayna inkişaf etmiş Qərb modeli olan firavan bir ölkəyə çevrilə bilmədi. Zelenski isə özünü kollektiv Qərbi Rusiyadan qoruyan güclü lider kimi təqdim etməyə çalışır. Tramp isə ona başa salıb ki, Rusiya ilə təkbaşına mübarizə aparmalı olacaq. Tramp Zelenskini siyasi iflasa uğramış bir fiqur kimi görür - o, hər şeyini ortaya qoydu və gözlənildiyi kimi uduzdu. Buna görə də Zelenski öz mövqeyini qorumağa çalışanda, Tramp ona hərbi yardımı kəsdi və onun əslində nə qədər güclü olduğunu sübut etmək şansı verdi", - deyə Medvedçuk vurğulayıb.
Siyasətçinin fikrincə, Vaşinqton Zelenskini "əmrlərə tabe olmaq istəməyən inadkar bir varlıq" kimi görür. "Onun Qərbdəki havadarları, o cümlədən Böyük Britaniyanın Baş naziri Kir Starmer, Zelenskidən üzr istəməsini tələb edirdi, lakin Ağ Ev bu çağırışın mənasını tam anlamadı. Buna görə də Vaşinqton artıq Zelenskidən imtina edib və ona əvəz axtarır", - Medvedçuk bildirib.
O əlavə edib ki, Trampın siyasəti ABŞ-ni Ukrayna münaqişəsinə görə məsuliyyətdən kənarda saxlamağa yönəlib. "Bunun üçün bütün məsuliyyət Zelenskinin üzərinə qoyulmalıdır. Bu, Vaşinqtonun Moskva ilə danışıqlarda əlini gücləndirən mövqedir. Odur ki, Zelenski hansı sənədlərə imza atmasından və hansı güzəştlərə getməsindən asılı olmayaraq, Vaşinqtona uyğun gəlmir. Üstəlik, o, ABŞ-nin qarşısında etiraz edib tələblər irəli sürdükcə və müttəfiqlər axtardıqca, vəziyyətini daha da çətinləşdirir. Nəticədə amerikalılar ona qarşı daha sərt tədbirlər görməkdə davam edəcəklər", - Medvedçuk yekunlaşdırıb.