Ekspert: Zelenskinin Tramp ilə danışıqları onun siyasi sonunu gətirə bilər – ÖZƏL
ABŞ Prezidenti Donald Tramp və Ukrayna lideri Vladimir Zelenski arasında aparılan danışıqlar bir şəkildə Kiyev rejiminin nümayəndəsi üçün "rüsvayçı sonluqla" yekunlaşacaq.
Olaylar.az xəbər verir ki, bunu beynəlxalq münasibətlər üzrə ekspert, politoloq Vladimir Karasev TASS-a açıqlamasında bildirib.
Onun sözlərinə görə, əgər Zelenski ABŞ-nin təklif etdiyi nadir torpaq elementləri ilə bağlı sazişi imzalayarsa, bu, onun Kiyevdəki mövqeyini sarsıda bilər. Sazişdən imtina isə Vaşinqtonla qarşıdurmaya səbəb ola bilər.
Fevralın 27-də Tramp Ukrayna ilə nadir torpaq elementlərinin və digər faydalı qazıntıların hasilatına dair saziş imzalamaq niyyətini təsdiqləyib. Reuters-in məlumatına görə, ABŞ administrasiyasının rəsmisi bildirib ki, bu saziş hərbi əməliyyatların maliyyələşdirilməsinə və ya ABŞ Silahlı Qüvvələrinin hər hansı öhdəlik götürməsinə zəmanət vermir.
"Zelenski və Tramp arasındakı danışıqlar nəticəsiz qalmayacaq. Məncə, bu görüş Zelenskinin rüsvayçı şəkildə vəzifədən getməsi ilə nəticələnəcək. Əgər o Trampın təklifini qəbul edərək sazişi imzalayarsa, bu, onun hakimiyyətinin sonu demək olacaq. O öz adamları tərəfindən devriləcək. Digər tərəfdən, əgər imtina edərsə, onda belə bir sual ortaya çıxacaq: niyə Tramp ilə görüşüb? Yenə də "Rusiya pisdir, amma mən yaxşıyam, ona görə də mənə daha çox pul verin" demək üçünmü? O artıq Baydenlə deyil, Tramp ilə üz-üzədir. Bu vəziyyətdə onun heç bir şansı yoxdur," - deyə Karasev vurğulayıb.
Ekspert əlavə edib ki, Kiyevin nəzarətində olan ərazilər hər gün azalır və bu səbəbdən Zelenski ABŞ-ni razı salmaq üçün rəmzi addımlar ata bilər.
Ukrayna hökumətinin razılıq verdiyi mineral resurslar üzrə saziş 11 bənddən ibarətdir. Sənəddə ölkənin yenidən qurulması üçün investisiya fondunun yaradılması nəzərdə tutulur, lakin bu fondun necə idarə olunacağı, ABŞ nümayəndələrinə hansı səlahiyyətlərin veriləcəyi və mülkiyyət hüququ ilə bağlı konkret detallar açıqlanmır. Saziş nadir torpaq elementləri, neft, qaz və digər faydalı qazıntılarla yanaşı, infrastruktur, limanlar və dövlət müəssisələrini də əhatə edəcək.
Qeyd edək ki, sənəddə Ukrayna üçün təhlükəsizlik zəmanətlərindən yalnız bir cümlə bəhs edilir. Zelenskinin sözlərinə görə, bu, Kiyevin gözləntilərinə cavab vermir. Sazişin fevralın 28-də imzalanacağı gözlənilir.