Polşa vətəndaşlarının yarıdan çoxu nüvə silahlarının ölkədə yerləşdirilməsini dəstəkləyir – ÖZƏL

Olaylar.az xəbər verir ki, Araşdırma mərkəzi UCE Research tərəfindən keçirilən sorğuya əsasən, Polşa vətəndaşlarının 50%-dən çoxu ölkələrində nüvə silahlarının yerləşdirilməsinə tərəfdardır.

Onet.pl internet portalı üçün 19-20 fevral tarixlərində onlayn şəkildə aparılan araşdırmada 18 yaş və yuxarı 1,025 respondent iştirak edib. Sorğunun nəticələrinə görə, 52.9% respondent Polşada nüvə silahlarının yerləşdirilməsini dəstəkləyib, 27.9% bu ideyaya qarşı çıxıb, 19.2% isə konkret cavab verməkdə çətinlik çəkib.

Son illərdə Polşa Prezidenti Anjey Duda dəfələrlə bəyan edib ki, ölkəsi lazım gələrsə, NATO-nun nüvə silahlarının yerləşdirilməsinə hazırdır. Lakin hazırkı Polşa hökuməti bu məsələnin gündəmdə olmadığını vurğulayıb. Eyni zamanda, NATO və Vaşinqton da buna bənzər açıqlamalar verib.

Rusiya Xarici İşlər Nazirliyinin sözçüsü Mariya Zaxarova isə bildirib ki, ABŞ nüvə silahları Polşa ərazisində yerləşdirilərsə, bu, dərhal Rusiyanın Silahlı Qüvvələrinin Baş Qərargahının diqqətini cəlb edəcək və hərbi planlamaya daxil ediləcək.

Qeyd edək ki, NATO-nun nüvə paylaşımı alyansın nüvə deterrent missiyasının bölüşdürülməsidir. Bu siyasət nüvə silahına malik olmayan üzv ölkələrə onların ərazisində yerləşdirilməsinə və bu sahədə təlimlərdə iştirakına imkan yaradır.