Netanyahu: “HƏMAS razılaşmanı kobud şəkildə pozdu” – ÖZƏL

İsrailin Baş naziri Benyamin Netanyahu HƏMAS-ın girov saxlanılan Şiri Bibasın cəsədi əvəzinə tanınmayan bir fələstinlinin meyitini təhvil verdiyini bildirib. O bunu "razılaşmanın qəddar və iyrənc şəkildə pozulması" adlandırıb.

"HƏMAS-ın vəhşiliyi sərhəd tanımır. Onlar təkcə atanı - Yarden Bibası, gənc ananı - Şiri və iki azyaşlı övladlarını girov götürmədilər. Onların tam mənəvi aşınması o həddə çatıb ki, hətta Şirinin körpələri ilə birlikdə olmasına da imkan vermədilər. Əvəzində isə tabutda tanınmayan bir fələstinli qadının cəsədini qaytardılar," - deyə Netanyahu bildirib.

O əlavə edib ki, İsrail girovların, həm sağ, həm də həlak olmuş olanların geri qaytarılması üçün qətiyyətlə hərəkət edəcək və HƏMAS "tam şəkildə cavab verəcək".

HƏMAS fevralın 20-də Qırmızı Xaç Komitəsinə Bibas ailəsinin üç üzvünün və Oded Lifşitsin cəsədlərini təhvil verdiyini açıqlayıb. İsrail ordusunun məlumatına görə, Lifşitz və Bibas qardaşlarının kimliyi təsdiqlənib, lakin dördüncü cəsədin - Şiri Bibas olduğu güman edilən şəxsin tanınması mümkün olmayıb.

Yanvarın 15-də İsrail və HƏMAS arasında girovların azad edilməsi və Qəzzada atəşkəsin tətbiqi ilə bağlı razılaşma əldə edildiyi açıqlanıb. Üç mərhələdən ibarət olan bu razılaşma yanvarın 19-da qüvvəyə minib. Birinci mərhələ 42 gün davam etməlidir və bu müddət ərzində HƏMAS azı 33 girovu İsrail həbsxanalarındakı fələstinli məhbuslarla dəyişməlidir.