Zaxarova CNN jurnalistlərindən gələn zənglərə zarafatla reaksiya verib – ÖZƏL
Olaylar.az xəbər verir ki, Rusiya Xarici İşlər Nazirliyinin rəsmi nümayəndəsi Mariya Zaxarova media üçün keçirilən brifinq zamanı CNN jurnalistlərindən gələn ardıcıl zənglərə zarafatla reaksiya verib. Brifinq, eyni vaxtda Ər-Riyadda keçirilən Rusiya-Amerika danışıqları ilə üst-üstə düşüb.
"Telefonum CNN müxbirlərinin zənglərindən partlayır. Kimsə onlara deyə bilərmi ki, bizdə brifinq gedir? Başa düşürəm, onlar özlərini istisna hesab edirlər, amma bu qədər də yox. Xahiş edirəm, bunu onlara çatdırın. Artıq telefonum qızıb", - deyə Zaxarova gülümsəyərək bildirib.
O əlavə edib ki, CNN jurnalistləri onun brifinqinə qoşula bilərlər.
Qeyd edək ki, çərşənbə axşamı Ər-Riyadda yüksək səviyyəli Rusiya-Amerika danışıqları başlayıb. Rusiya tərəfini Xarici İşlər Naziri Sergey Lavrov və Prezidentin köməkçisi Yuri Uşakov təmsil edir. ABŞ nümayəndələri sırasında Prezidentin milli təhlükəsizlik üzrə köməkçisi Mayk Uolts, Dövlət katibi Marko Rubio və ABŞ liderinin Yaxın Şərq üzrə xüsusi elçisi Stiven Uitkoff yer alıb. Danışıqlara Səudiyyə Ərəbistanı nümayəndələri rəhbərlik edir.
Uşakovun sözlərinə görə, görüşdə əsas müzakirə mövzusu Ukrayna üzrə danışıqlara necə başlanılması ilə bağlı razılığa gəlməkdir.