Tokio Rusiya ilə əlaqələrdə milli maraqlara üstünlük vermək niyyətindədir – ÖZƏL

Yaponiya Rusiya ilə qonşuluq münasibətlərində milli maraqlarını prioritet hesab edir. 

Olaylar.az xəbər verir ki, bu barədə Yaponiya Xarici İşlər naziri Takeşi İvaya açıqlama verib.

"Yaponiya və Rusiyanın müzakirə edəcəyi çox məsələ var. Münasibətlərimiz hazırda gərgin olsa da, Rusiya ilə əlaqəni qorumağın vacib olduğuna inanırıq. Moskva ilə münasibətlərdə Yaponiyanın milli maraqlarına uyğun davranmağa davam edəcəyik," - deyə nazir bildirib.

İvaya həmçinin Ukrayna münaqişəsi çərçivəsində Rusiya-ABŞ dialoqunun əhəmiyyətini vurğulayıb və Yaponiyanın G7 və digər ölkələrlə sıx əməkdaşlıq edərək "ədalətli və uzunmüddətli sülhə" nail olmaq niyyətində olduğunu qeyd edib. O Yaponiyanın suverenlik və ərazi bütövlüyünü əsas prinsip kimi qəbul etdiyini də əlavə edib.

Bununla yanaşı, Yaponiya Nazirlər Kabinetinin baş katibi Yoşimasa Hayaşi son açıqlamasında hökumətin Ukraynanın suverenliyi və ərazi bütövlüyünü dəstəkləyən ənənəvi mövqeyini qeyd etməyib. Bu, ABŞ Prezidenti Donald Trampın Ukraynanın 2014-cü il sərhədlərinə qayıtmasının çətin olduğunu bildirməsindən sonra baş verib.

Fevralın 12-də Rusiya Prezidenti Vladimir Putin və ABŞ Prezidenti Donald Tramp arasında Ukrayna münaqişəsinin həlli ilə bağlı telefon danışığı olub. Kremlin məlumatına görə, Tramp döyüşlərin dərhal dayandırılmasının və sülh yolu ilə həllin tərəfdarı olduğunu bildirib. Putin isə münaqişənin köklü səbəblərinin nəzərə alınmasının vacibliyini vurğulayıb və uzunmüddətli nizamlanmanın diplomatik yolla mümkün olduğunu qeyd edib.