"Futbolçulara etirazım yoxdur" - Tərlan Əhmədov

"Həqiqətən də maraqlı oyun alındı. Azərbaycanın ən güclü komandasına qarşı oynadıq. Buna baxmayaraq, komandam yaxşı mübarizə apardı". Qol.Az-ın PFL-in rəsmi saytına istinadən verdiyi məlumata görə, bu sözləri AZAL-ın baş məşqçisi Tərlan Əhmədov Premyer Liqanın 21-ci turunda məğlub olduqları "Qarabağ"la oyundan sonra (0:1) keçirilən mətbuat konfransında deyib. Təcrübəli mütəxəssis məğlubiyyətə baxmayaraq futbolçularından razı qaldığını bildirib: "Qələbə qazanmaq istəyirdik. Lakin bu oyunda 1 xal da bizi qane edə bilərdi. Futbolçulara heç bir etirazım yoxdur. Sadəcə, səhvlər üzərində işləməliyik. Növbəti tur bizi çətin Sumqayıt səfəri gözləyir. Həmin oyuna ciddi hazırlaşmalıyıq".