Qırğızıstanda məhkumluğu olan şəxslərə yüksək vəzifələrə qadağa qoyuldu – ÖZƏL

Qırğızıstan Prezidenti Sadır Japarov vətəndaşların dövlət orqanlarına inamını artırmaq, yüksək vəzifəli şəxslərin qüsursuz reputasiyasını təmin etmək və hüquq üstünlüyünü möhkəmləndirmək məqsədilə bir sıra qanunlara dəyişiklikləri nəzərdə tutan Konstitusiya Qanununu imzalayıb. 

Olaylar.az xəbər verir ki, bu barədə dövlət başçısının mətbuat xidməti məlumat yayıb.

Yeni dəyişikliyə əsasən, məhkumluğu (o cümlədən silinmiş və ya ödənilmiş) olan, yaxud barəsində cinayət işi bəraətə əsaslanmayan səbəblərlə dayandırılmış şəxslər artıq bir sıra yüksək dövlət vəzifələrinə təyin edilə və ya seçilə bilməyəcəklər.

Qadağa aşağıdakı vəzifələri əhatə edir:
    •    Prezidentliyə namizəd olmaq və seçilmək;
    •    Parlament - Joqorku Keneş deputatlığına namizəd olmaq və seçilmək;
    •    Nazirlər Kabinetinin sədri və üzvləri, eləcə də digər icraedici orqanların rəhbərliyi;
    •    Seçkilər və referendumların keçirilməsi üzrə Mərkəzi Komissiyanın üzvlüyü;
    •    Qırğızıstan Milli Bankının rəhbərliyi və İdarə Heyəti üzvləri;
    •    Hesablama Palatasının auditor və rəhbərlik vəzifələri.

Bundan əlavə, dini fəaliyyətlə məşğul olmuş şəxslər dini fəaliyyəti dayandırdıqdan sonra 5 il ərzində nə prezident, nə də deputat seçilə biləcəklər.

Dəyişikliklər "Prezident və Joqorku Keneş deputatlarının seçkiləri haqqında", "Mərkəzi Seçki Komissiyası", "Nazirlər Kabineti", "Milli Bank" və "Hesablama Palatası" haqqında Konstitusiya qanunlarına daxil edilib.

Yeni qanun rəsmi dərcindən 10 gün sonra qüvvəyə minəcək. Sənədə əlavə olunan izahatda qeyd olunur ki, bu tədbirlər hakimiyyətin şəffaflığını və məsuliyyətini artırmaqla, dövlət vəzifələrini yalnız qüsursuz nüfuza malik şəxslərin tutmasını təmin etməyə xidmət edir.