Gümrü meri həbs olunan yepiskopları müdafiə etdi: “Bu, siyasi sifarişdir” – ÖZƏL

Olaylar.az xəbər verir ki, Gümrü meri Vardan Qukasyan 28 iyulda jurnalistlərlə görüşündə arxiyepiskop Baqrat Qalstanyan və Mikael Acapaxyanın həbslərini qəti şəkildə pislədiyini bildirib.

O qeyd edib ki, hər iki din xadimi Gümrüdəndir: "Mikael Acapaxyanla baxışlarımız üst-üstə düşməsə də, onu hörmətlə qarşılayıram və bu hadisənin siyasi sifariş olduğunu düşünürəm".

Mer bildirib ki, rəsmi ittihamla tanış deyil, amma baş verənlərə çox mənfi yanaşır: "Mənim 65 yaşım var və ilk dəfədir ki, yepiskopların həbs olunduğunu görürəm. Belə hallar yalnız 1937-ci ildə baş verirdi".

Xatırladaq ki, Ermənistan Apostol Kilsəsinin Şirak yeparxiyasının rəhbəri arxiyepiskop Mikael Acapaxyan və "Müqəddəs Mübarizə" hərəkatının lideri arxiyepiskop Baqrat Qalstanyana qarşı Ermənistan Cinayət Məcəlləsinin 422-ci maddəsinin 2-ci bəndi üzrə (hakimiyyətin zorla ələ keçirilməsinə, ərazi bütövlüyünün pozulmasına, suverenlikdən imtinaya və ya konstitusiya quruluşunun zorla devrilməsinə açıq çağırışlar) cinayət işi açılıb. Hər iki dini lider həbs olunub.