Ev Həbsinə etiraz: Evgeniya Gutsul məhkəmə qərarını apellyasiya edib- ÖZƏL

Olaylar.az xəbər verir ki, Qaqauziya rəhbəri Evgeniya Gutsul ev dustaqlığına alınması ilə bağlı məhkəmə qərarının vəkilləri tərəfindən apellyasiya edildiyini bildirib. Onun sözlərinə görə, bu qərar onun muxtariyyəti idarə etməsinə ciddi maneə yaradır.

"Artıq qərardan şikayət vermişik, apellyasiyanın nə zaman baxılacağını gözləyirik. Ümid edirik ki, hakimlər ədalətli və qanuni qərar verəcəklər. Çünki ev həbsi belə, bir çox sahədə məhdudiyyətlər yaradır. Qaqauziya diqqət tələb edir və mənim şəxsən Komratda olmağım vacibdir," - deyə Gutsul jurnalistlərə bildirib. O, bu açıqlamanı "Şor" partiyasının qeyri-qanuni maliyyələşdirilməsində iştirakı ilə bağlı onun haqqında qaldırılan cinayət işi üzrə keçirilən növbəti məhkəmə iclası öncəsində verib.

Gutsul ilə Moldova hakimiyyəti arasında münasibətlər 2023-cü ildə keçirilən seçkilərdə onun qələbəsindən sonra daha da gərginləşib. Siyasətçi bölgənin Rusiya ilə dost münasibətlərini gücləndirmək niyyətində olduğunu bəyan edib və Kişinyovun Moskva ilə qarşıdurma siyasətini tənqid edib. Moldova hökuməti seçkiləri qanunsuz elan etməyə çalışsa da, Qaqauziya parlamenti Gutsul ilə həmrəyliyini ifadə edib və bölgədə onun dəstəyi ilə kütləvi aksiyalar keçirilib. Moldova Prezidenti Maya Sandu qanunvericiliyin tələb etməsinə baxmayaraq, Gutsulun hökumət üzvü kimi təsdiqlənməsi ilə bağlı fərmanı imzalamaqdan imtina edib.