ABŞ-ın Rusiya ilə yaxınlaşması NATO-nun əsaslarını sarsıda bilər – AFP- ÖZƏL

Avropa diplomatları Vaşinqtonun Moskva ilə yaxınlaşmasının NATO-nun təməl prinsiplərinə zərbə vura biləcəyindən narahatdır. Olaylar.az xəbər verir ki,  bu barədə Agence France-Presse (AFP) məlumat yayıb.

"Optimizm səviyyəsi açıq şəkildə azalır. ABŞ hələ konkret addımlar atmasa da, hər gün alyansın əsaslarına yeni zərbə vurur", - deyə Avropa diplomatı agentliyə bildirib.

AFP qeyd edir ki, ABŞ prezidenti Donald Trampın Moskva ilə əlaqələr qurması alyans daxilində Vaşinqtonun NATO-nun əsas rəqibi hesab edilən Rusiya tərəfinə keçə biləcəyi qorxusunu artırıb.

Bununla belə, alyans nümayəndələri ehtimal edirlər ki, Trampın Rusiya ilə dialoqu Ukrayna münaqişəsini həll etmək üçün bir diplomatik taktika ola bilər. "Bu, udulması çətin bir həqiqət ola bilər, lakin əgər bu, sadəcə taktiki bir addımdırsa, qəbul edilə bilər. Əgər strateji bir dönüşdürsə, bu, ciddi bir problemdir", - Avropa diplomatlarından biri bildirib.

Rusiya prezidenti Vladimir Putin və ABŞ prezidenti Donald Tramp martın 18-də telefon danışığı zamanı Ukraynadakı vəziyyəti, gərginliyin artmasının qarşısının alınması yollarını və bir sıra beynəlxalq məsələləri müzakirə ediblər.

Kremlin mətbuat xidmətinin məlumatına görə, Putin Trampın Ukraynadakı münaqişə tərəflərinin 30 gün müddətinə enerji infrastrukturu obyektlərinə hücumları dayandırmaq təklifini qəbul edib. Ağ Ev isə tərəflərin Qara dənizdə atəşkəs rejimi, tammiqyaslı atəşkəs və daimi sülhə nail olmaq üçün texniki danışıqlara başlamaq barədə razılığa gəldiyini açıqlayıb. Kreml isə münaqişənin həlli üçün əsas şərtin Ukraynaya xarici hərbi yardımların və kəşfiyyat məlumatlarının verilməsinin tam dayandırılması olduğunu vurğulayıb.