Cənubi Koreyada baş nazir müavininin impiçmenti ilə bağlı qanun layihəsi parlamentdə təqdim edilib- ÖZƏL

Cənubi Koreyanın baş nazir müavini, iqtisadiyyat və maliyyə naziri Çxve San Mokun impiçmenti ilə bağlı qanun layihəsi Milli Assambleyanın (parlamentin) plenar iclasında təqdim edilib. Olaylar.az xəbər verir ki,  bu barədə Yonhap agentliyi məlumat yayıb.

Mövcud qanunvericiliyə əsasən, impiçmentlə bağlı səsvermə təşəbbüs parlamentin plenar iclasında təqdim edildikdən sonra ən azı 24 saat, lakin ən çoxu 72 saat ərzində keçirilməlidir.

İmpiçment layihəsi parlamentin müvafiq komitəsinə hələ 21 mart tarixində təqdim olunmuşdu. Həmin vaxt Çxve San Mok prezidentin səlahiyyətlərini icra edirdi. Qanun layihəsi 188 deputat tərəfindən dəstəklənib. Nazirin vəzifədən uzaqlaşdırılması üçün 300 nəfərlik parlamentdə ən azı 151 deputatın səsi tələb olunur.

Qeyd edək ki, 24 martda Cənubi Koreyanın Konstitusiya Məhkəməsi baş nazir Han Dok Sunun impiçmentini ləğv edərək onu vəzifəsinə bərpa edib. Bununla da o, prezident səlahiyyətlərinin icrasını da öz üzərinə götürüb.