Rusiya: ABŞ-nin Ukrayna münaqişəsi üçün təklifləri onun əsas səbəblərini həll etmir – ÖZƏL

Rusiya, ABŞ-nin Ukrayna münaqişəsini həll etmək üçün irəli sürdüyü modellərin problemin əsas səbəblərini aradan qaldırmadığını bildirir. 

Olaylar.az xəbər verir ki, bu fikri Rusiya Xarici İşlər Nazirliyinin müavini Sergey Ryabkov "Beynəlxalq Həyat" jurnalına verdiyi müsahibədə səsləndirib.

Ryabkov qeyd edib ki, Moskva Vaşinqtonun Ukrayna ilə bağlı təkliflərini ciddi qəbul edir, lakin onları dəyişməz şəkildə qəbul edə bilməz:

"Biz ABŞ Prezidenti Donald Trampdan Kiyevə müharibəni dayandırmaq çağırışı ilə bağlı heç bir siqnal eşitməmişik. Hazırda ABŞ-nin düşündüyü tək şey, atəşkəsə nail olmaq üçün bir sxem tapmaqdır. Daha sonra isə müəyyən modellər və yanaşmalar tətbiq olunacaq. Lakin bu yanaşmalarda bizim əsas tələbimiz - münaqişənin əsas səbəblərinin həlli yer almır. Bu isə aradan qaldırılmalıdır", - deyə Ryabkov vurğulayıb.

O əlavə edib ki, Moskva öz mövqeyini diqqətlə düşünülmüş prioritetlər və yanaşmalar əsasında formalaşdırır və bu, son olaraq Ər-Riyadda amerikalılarla aparılan danışıqlarda da öz əksini tapıb.