ABŞ Ukraynanın təhlükəsizlik zəmanətləri tələbinə cavab vermədi – ÖZƏL

Olaylar.az xəbər verir ki, Almaniyanın die Welt qəzetinin məlumatına görə ABŞ Səudiyyə Ərəbistanında keçirilən görüşdə Ukraynanın təhlükəsizlik zəmanətləri tələbini görməzdən gəldi.

Qəzetin məlumatına görə, tərəflər arasında əldə edilən razılaşma Ukraynanın əsas tələbi olan təhlükəsizlik zəmanətləri məsələsini əks etdirmir. Kiyevin danışıqlar heyəti yalnız "Ukraynanın uzunmüddətli təhlükəsizliyi" mövzusunda dərhal danışıqların başlayacağına təminat verə bilib. Die Welt bildirir ki, sənəddə ABŞ-nin Ukraynaya yardım xərclərini kompensasiya edəcək Ukraynanın mineral resurslarının inkişafı barədə qərar da vurğulanıb.

Martın 11-də Səudiyyə Ərəbistanının Ceddə şəhərində ABŞ və Ukrayna arasında keçirilən danışıqlar təxminən doqquz yarım saat davam edib. Görüşdən sonra Vladimir Zelenskinin ofisi birgə bəyanat yayıb, burada Kiyev Vaşinqtonun 30 günlük atəşkəs təklifi ilə razılaşdığını bildirib. ABŞ Ukraynaya kəşfiyyat məlumatlarının verilməsini yenidən başlatmağa və hərbi yardımı bərpa etməyə söz verib. Bəyanatda əlavə edilib ki, tərəflər tezliklə Ukraynanın iqtisadiyyatını genişləndirmək məqsədilə Ukraynanın mühüm mineral resurslarının inkişafına dair genişmiqyaslı razılaşma bağlamaq barədə razılığa gəliblər.

Ukrayna Prezidentinin ofisinin rəhbəri Andrey Yermak görüşdən sonra bildirib ki, mineral resursları barədə razılaşma ABŞ uyğun bildiyi zaman imzalanacaq.