Qrenlandiya seçkilərində qalib partiya: "Qrenlandiya satılmır" – ÖZƏL

Olaylar.az xəbər verir ki, Qrenlandiyada parlament seçkilərində 29,9% səs toplayaraq qalib gələn Demokraatit (Demokratlar) partiyasının lideri Yens-Frederik Nilsen Qrenlandiyanın satılmayacağını bəyan edib. Politico nəşrinin məlumatına görə, o, ABŞ Prezidenti Donald Trampın Qrenlandiyanı almaq istəyini tənqid edərək, bu cür fikirləri "siyasi müstəqilliyimizə təhdid" adlandırıb.

Martın 12-də keçirilən seçkilərdə seçici fəallığı 70,9% olub. 40 369 nəfərdən 28 620-si səsvermədə iştirak edib. 2021-ci ildə bu göstərici 65,9% idi, rekord isə 1999-cu ildə 76% təşkil edib.

Seçkilərdə digər partiyaların topladığı səslər belə olub:

Naleraq (Milestone) - 24,5%

Inuit Ataqatigiit (Xalq Birliyi) - 21,4%

Siumut (İrəli, sosial-demokratlar) - 14,7%

Atassut (Həmrəylik, liberal-mühafizəkarlar) - 7,3%

2023-cü ildə yaradılan Qulleq (İşıq) partiyası isə cəmi 1,1% səs toplayıb.

Tramp daha əvvəl dəfələrlə Qrenlandiyanın ABŞ-nin bir hissəsi olması gərəkdiyini bildirib. Seçki kampaniyasının əsas mövzularından biri adanın müstəqilliyi olub. Tramp ilk prezidentliyi dövründə (2017-2021) Qrenlandiyanı almağı təklif etmiş, lakin Danimarka və Qrenlandiya rəsmiləri bu ideyanı dərhal rədd etmişdilər. O, Danimarkanın adaya nəzarətdən imtina etməyəcəyi təqdirdə yüksək ticarət rüsumları tətbiq edəcəyini də bildirmişdi.