Azərbaycan Kubanın "Havana" televiziya kanalında
Kubanın Havana televiziya kanalında Azərbaycanın tarixi, mədəniyyəti, mətbəxi və Novruz bayramına həsr edilmiş veriliş nümayiş etdirilmişdir. Veriliş zamanı Azərbaycanın zəngin təbiəti və turizm imkanları, xalqımızın adət və ənənələrindən geniş bəhs edilmişdir. Bildirilmişdir ki, dünyanın ən qədim xalqlarından biri olan Azərbaycan xalqı öz mədəni sərvəti və abidələri, ədəbiyyatı, incəsənəti və musiqi irsi ilə qürur duyulası bir tarixə malikdir. Qeyd edilmişdir ki, azərbaycanlıların fərqli həyat tərzi, estetik zövqü və milli özünəməxsusluğu xalq musiqisi və folklorunda aydın şəkildə əks olunur. Veriliş zamanı Azərbaycanda qədim dövrlərdən indiyədək mövcud olan xalçaçılıq, zərgərlik, miskarlıq və sair sənətkarlıq nümunələri və tarixi memarlıq abidələrindən bəhs edilmişdir. Azərbaycanın xalq musiqisindən danışarkən, min illərlə yaşı olan Azərbaycan folklorunda mühüm yer tutan muğam musiqisi haqda söz açılmışdır. Veriliş ərzində Azərbaycanda böyük sevgi ilə qeyd edilən Novruz bayramı və xalqımızın milli ənənələrindən ətraflı bəhs olunmuşdur. Bildiirlmişdir ki, Azərbaycanda özünə məxsus fəlsəfəsi olan Novruz bayramı xalqımızın qeyri-maddi mədəni irsi kimi sülhsevərlik mədəniyyətini təbliğ edərək, bərabərlik və qardaşlıq rəmzinə çevrilmişdir. Verilişdə qədim tarixə və mədəni irsə malik olan Azərbaycanda 1918-ci ildə şərq aləmində ilk dəfə olaraq dünyəvi və demokartik dövlətin qurulduğu haqda məlumat verilmişdir. Xalqımızın Ümummilli Lideri Heydər Əliyevin rəhbərliyi altında Azərbaycanın SSRİ tərkibində, daha sonra isə müstəqil dövlət kimi uğurlu inkişafı haqda məlumat verilmişdir. Azərbaycanın Kubadakı müvəqqəti işlər vəkili Cavanşir Salehov Havana kanalına müsahibəsində Novruz bayramının qeyd edilməsi ilə bağlı xalqımızın özünəməxsus adətlərindən bəhs etmişdir. Azərbaycan diplomatı müsahibə zamanı ölkələrimiz arasında ikitərəfli münasibətlərin tarixi və əldə edilmiş uğurlardan danışmışdır. İki ölkə arasında mədəni və siyasi əlaqələrin, habelə beynəlxalq təşkilatlar çərçivəsində əməkdaşlığın inkişaf etdiyi qeyd olunmuşdur. Veriliş zamanı Azərbaycanın milli mətbəxinə məxsus təamların hazırlanmasına xüsusi yer ayrılmışdır. Azərbaycanın Kubadakı müvəqqəti işlər vəkilinin xanımı Afət Salehova veriliş ərzində ölkəmizdə Novruz bayramının xüsusi şirniyyatları və onların simvolik mənaları haqda danışmış, şəkərbura, paxlava və Azərbaycanın milli yeməklərindən biri olan dolmanın hazırlanması qaydalarını nümayiş etdirmişdir. Qeyd edilməlidir ki, "Odlar Yurdu Azərbaycan" layihəsi çərçivəsində fevralın 21-dən başlayaraq hər çərşənbə axşamlarında Kubanın televiziya və radio kanalları vasitəsi ilə Azərbaycanda Novruz bayramının adətləri haqda davamlı reportajlar yayımlanmışdır. Verilişin videoyazısını yükləmək / izləmək üçün aşağıdakı linklərdən istifadə edə bilərsiniz:
https://we.tl/v3TlFJHag5 (HD format)
https://youtu.be/W63X78Nbc6k