İkinci “Ağıllı kənd”in enerji təminatı yaşıl və alternativ mənbələr hesabına ödəniləcək
Xəbər verildiyi kimi, Azərbaycanda ikinci "Ağıllı kənd" Füzuli rayonu Dövlətyarlı kəndində salınacaq. Qeyd edək ki, kəndin təməli ötən il oktyabrın 17-də Prezident İlham Əliyev tərəfindən qoyulmuşdur. Füzuli rayonunun Dövlətyarlı kəndində yeni salınacaq "Ağıllı kənd"də neçə ailə məskunlaşacaq və hansı üstünlükləri olacaq?
Millət vəkili Vüqar Bayramov "Olaylar"a bildirib ki, Dövlətyarlı kəndində üç, dörd və beşotaqlı olmaqla, ümumilikdə ilkin mərhələdə 450 evin inşası nəzərdə tutulub. Kənddə məktəb və uşaq bağçası tikiləcək, kəndin mərkəzində meydan salınacaq, bazar inşa ediləcək: "Kənd sakinlərinin məşğulluğunun necə təmin olunacağı məsələsinə gəldikdə, kəndin yerləşmə coğrafiyası və təbii üstünlükləri nəzərə alınmaqla bir neçə sektor üzrə müəssisələrin yaradılması nəzərdə tutulub. Belə ki, kartofçuluq dəyər zənciri üzrə müəssisələrin yaradılması planlaşdırılır. Bu müəssisələrdə 40 daimi, 300-dək mövsümi iş yeri yaradılacaq. Eyni zamanda Köndələnçay su anbarı əsasında ağıllı akvakultura sistemlərinin tətbiqi hesabına balıqçılıq təsərrüfatının qurulması da nəzərdə tutulub. İstehsal olunacaq balıq məhsullarının ixrac ediləcəyi gözlənilir. Kənddə quşçuluq təsərrüfatı da yaradılacaq, ilkin mərhələdə 85 daimi iş yeri olacaqKəndin iqlimi və relyef üstünlükləri nəzərə alınaraq turizm infrastrukturunun formalaşdırılması və otel infrastrukturunun yaradılması nəzərdə tutulub. Bütün bunlarla yanaşı, kəndin ətrafında isə "Ağıllı kənd" təsərrüfatı sahəsi olacaq. Beləliklə, sakinlərinin kənd təsərrüfatı ilə məşğul olması üçün də imkan yaradılacaq". Millət vəkili qeyd edib ki, kəndin enerji təminatı yaşıl və alternativ mənbələr hesabına ödəniləcək: "Kənddə xarici investisiya əsasında alternativ enerji həlləri məqsədilə günəş paneli tarlası salınacaq. İnvestisiya layihəsinin gücü 50 meqavat olacaq. Burada 20 daimi iş yeri yaradılacaq. Artıq kəndin salınması ilə bağlı hazırlıq işləri aparılır. Kəndin layihəsi təsdiq olunub. Qısa zamanda inşaat işləri intensivləşəcək".